Шараға жиылғандар «Достық аллеясы» мәдени іс-шаралар, кездесулер мен ұлтаралық келісімді нығайтуға бағытталған акциялар өтетін орынға айналатынын атап өтті. Олардың ішінде шараға белсене қатысқандар арасында І. Жансүгіров атындағы университеттің Қазақстан халқы Ассамблеясы кафедрасының меңгерушісі Бархудар Гусенов те бар.
– Бүгінгі отырғызылған 30 көшет саны кездейсоқ таңдалған жоқ. Ол – Ассамблеяның 30 жылдық тарихындағы татулық пен тұрақтылықтың, түрлі этностардың бір шаңырақ астында бейбіт өмір сүріп келе жатқанын білдіретін символ. Әр отырғызылған тал – табиғатқа деген қамқорлықтың ғана емес, ел болашағына қалдырылған рухани мұраның, үміттің де көрінісі. Ал «Болашаққа хат» уақыт капсуласының салынуы – бүгінгі ұрпақтың ертеңгі күнге деген сенімі, елдің болашағына аманат еткен жүрек сөзі деп білемін, – дейді ол.
«30 жыл – Қазақстан халқы Ассамблеясы үшін тұтас бір дәуір. Ол – ұлтаралық бейбітшілік пен келісімнің, бірліктің символына айналды. «Достық аллеясының» ашылуы – бұл жай ғана көркем бастама емес, бұл Ассамблея атқарып жатқан ұлы миссия туралы терең еске салу. Бәріміз үшін Қазақстан – әр ұлттың мәдениеті мен дәстүрі құрметтелетін ортақ үй», – деді облыстық корей этномәдени бірлестігінің төрағасы Владимир Ли.
Сондай-ақ бұл жарқын оқиғаның қатысушылары Ассамблея үш онжылдық ішінде ұлтаралық қатынастарды үйлестіруге ықпал ететін маңызды институтқа айналғанын атап өтті. Оның қызметі білім беру бағдарламаларынан бастап қайырымдылық шараларына дейін қоғам өмірінің барлық салаларын қамтиды. Олардың айтуынша, Талдықорғандағы Достық аллеясы – қоғамдық келісімді нығайту мен бейбітшілік идеалдарын ілгерілету жолындағы тағы бір қадам.
Салтанатты рәсімнің ерекше сәті – түрлі этнос өкілдерінің жолдаулары салынған «Болашаққа хат» уақыт капсуласының қойылуы болды. Үміт пен шабытқа толы бұл хаттар Қазақстанның болашақ тұрғындарына арналып жазылған. Олар қоғам дамуының негізі болып табылатын бейбітшілік, достық пен өзара құрметті сақтап қалуға деген ұмтылысты бейнелейді.
«Бұл аллеяның пайда болуы – бірлік, достық және қоғамдық келісімнің жарқын символы. Аллея біздің қоғамымызбен бірге өсіп, барлығына негізгі құндылықтар туралы ескерту жасап тұратын болады. Уақыт капсуласына салынған барлық тілектер келесі жылдары өз шындықтарына айналса деп тілеймін», – деп әсерлерімен бөлісті Жетісу облысы «Славян қозғалысы» қоғамдық бірлестігінің төрайымы Наталья Белик.
Осылайша, аталған аллея Талдықорған қаласының халық демалатын көрнекті орындарының біріне айналмақ. Уақыт капсуласын 2045 жылы, Ассамблеяның 50 жылдық мерейтойы өтетін жылы ашу жоспарланып отыр.
Қатысушылар шара соңында естелік суретке түсіп, ақсақалдар шараны ұйымдастырушылар мен жастарға ақжолтай тілектерін білдірді.
С.БЕГІМБАЙ