Қатысушылар ЭКСПО аумағынан «Бәйтерек» монументіне дейін жүгіріп, Түркістан мен Ақмешіт көшелері арқылы кері қарай қайтты. Кәсіби спортшылардан бастап белсенді өмір салтын ұнататындарға дейін әртүрлі жастағы қатысушы бар.
Мереке күні елордалық желаяқтармен бірге өзге өңірлерден келген қатысушылар да жарыс жолына шықты: жарыс бір уақытта еліміздің 20 облысында өтті. Басты мақсат – бірліктің, достықтың және саламатты өмір салтының маңызын көрсету.
«Спорт бәрімізді бір арнаға тоғыстырады. Бүгін жас-кәрінің, түрлі ұлт өкілінің арасында жүгірдім. Міне, бұл ұлттар арасындағы нағыз достықтың белгісі», – деп марафонға қатысушылардың бірі өз әсерімен бөлісті.
Марафон бірнеше қашықтықты қамтыды: балалар мен мүмкіндігі шектеулі жандар үшін 1 шақырым, скандинавиялық жүріске арналған 5 шақырым, бұқаралық қолдау жүгіруі және тәжірибелі жүгірушілерге арналған 10 және 21,1 шақырым қашықтықтар. Қатысушылар жас ерекшелігіне қарай бөлінді. Ерекше қызығушылық тудырған кезең – 30 шақырым командалық эстафета (6×5 шақырым), әр команда құрамында міндетті түрде бір әйел болуы тиіс. Жарыс соңында жүлделер ойнатылды.
Қатысушылар белгіленген қашықтықты еңсеріп қана қоймай, іс-шарадан кейін айналадағы қоқысты жинап, «Таза Қазақстан» акциясына қатысты.
Бұл марафон – Бірлік күніне арналған ауқымды бағдарламаның бір бөлігі. Мереке қарсаңында елордада көрмелер мен викториналардан бастап түрлі концерт пен спорттық жарыс сияқты әртүрлі іс-шара өтті.