Республикалық және өңірлік газет-журналдардың басшылары мен өкілдері, сондай-ақ оқырмандар қатысқан іс-шараны ашқан «Қазпошта» АҚ астаналық филиалы директорының орынбасары Аслан Масекеев пошта қызметі мен мерзімді баспасөз редакциялары арасындағы кәсіби әріптестіктің маңызын атап өтіп, алдағы уақытта да өзара байланыс жалғасын таба беретініне сенім білдірді.
Акционерлік қоғамның пошта және мемлекеттік қызметтер жөніндегі басқарушы директоры Дәулет Бекманов Қазпоштаның отыз жыл ішінде халыққа миллиардтан астам газет пен журнал жеткізгенін атап өтті. Ауыл тұрғындары да назардан тыс қалмайды.
– Жыл сайын біздің пошташылар мыңдаған шақырым жүріп, басылымдарды оқырмандарға жеткізеді. Ал сұрыптаушылар күн сайын ондаған мың газет-журнал данасын іріктейді. Жазылу процесін ыңғайлы ету үшін Қазпошта заманауи цифрлық шешімдерді пайдалана оты-рып, өз қызметтерін жетілдіріп келеді, – деді Дәулет Бекманов.
«Қазақ газеттері» ЖШС бас директорының бірінші орынбасары Виктор Пряников мерзімді басылымдар мен Қазпоштаның халықты ақпараттандыру жолында ортақ үлкен істі атқарып келе жатқанын атап өтті.
– Бүгінде интернет дәуірі үстемдік етіп тұрғанына қарамастан, біздің басылымдарымыздың таралымы әлі де айтарлықтай жоғары. Біз өз аудиториямыз үшін маңызды мемлекеттік жаңалықтармен қатар, қызықты оқырмандық материалдарды да ұсынып келеміз, – деді Виктор Пряников.
«Қазпошта» АҚ қалалық филиалының сату бөлімінің бас маманы Ляззат Қонақбаева елордадағы жазылу науқанына жауап береді. Оның айтуынша, Астана тұрғындары газеттер мен журналдарды белсенді түрде оқиды. Ол жазылуды пошта бөлімшелерінде де, QazPost қосымшасы арқылы да рәсімдеуге болатынын еске салды.
Астаналық поштаның кең залында «Егемен Қазақстан», «Казахстанская правда», «Айқын», «Литер», Тurkistan, Astana aqshamy, «Вечерняя Астана» газеттері мен National Geographic Qazaqstan журналының арнайы сөрелері ұйымдастырылып, баспасөз өнімдері жұрт назарына ұсынылды.
Мерекелік жиын барысында мерзімді басылымдарға жазылған оқырманға редакция атынан сый-сияпат берілді.
Қазпоштаның баспасөз қызметінің хабарлауынша, республикалық басылымдарға жазылу науқаны 2025 жылдың екінші жартыжылдығына – 25 маусымға дейін, ал шетелдік басылымдарға 10 маусымға дейін жалғасады.
С.БЕГІМБАЙ