Жаһандық маңызы бар жиында Қазақстаннан өзге Германия, Ресей, Қырғызстан және Өзбекстан мемлекетінен келген заң шығарушы, атқарушы және сот билігі өкілдері, халықаралық ұйымдардың сарапшылары мен ғалымдар бас қосты. Біріккен Ұлттар Ұйымының №16 Тұрақты даму мақсатына, яғни «Бейбітшілік, әділет және тиімді институттарды» ілгерілетуге, қазіргі жаһандық өзгерістер жағдайында мемлекет пен қоғам арасындағы серіктестікті күшейтуге бағытталған кездесу жыл сайын дәстүрлі түрде ұйымдастырылады.
Саяси ғылымдар докторы, профессор Гүлмира Сұлтанбаева конференция аясында мемлекеттік басқаруды цифрландырудан бастап, жасанды интеллект этикасы мен халықаралық тәжірибеге дейінгі өзекті мәселелер талқыланғанын, сондай-ақ мемлекеттік органдар мен азаматтық қоғам институттарына арналған нақты ұсыныстар әзірленгенін жеткізді.
– Бүгінгі іс-шараға ғылыми қауым Қазақстандағы «Еститін мемлекет» атты тұжырымдаманы қолдау мақсатында жиналып отыр. Орталық Азия және Еуропа ғалымдарының басын қосқан жиында алғаш рет мемлекеттік органдар, соның ішінде заң шығарушы, атқарушы органдар мен олардың үкіметтік емес ұйымдармен, БАҚ өкілдерімен байланысы сынды келелі мәселелер талқыланды. Іс-шараның басты мақсаты да сол, ғылыми жиын аясында тиімді механизмдерді ұсыну. Конференцияда көтерілген маңызды проблемалардың қатарында Ұлттық құрылтайдың халыққа билік тарапынан қаншалықты жақындайтыны, мемлекет пен халық арасындағы диалог, жасанды интеллекттің қоғам өміріне енуі, электронды үкіметтің тиімді жұмыс істеуі сынды тақырыптар қамтылған. Қазіргі уақытта елімізде электронды үкіметтің жүзеге асырылып келе жатқанына 20 жылдан астам уақыт өтті. Әлемдік электронды демократия мен электронды үкімет рейтингінде Қазақстан жоғары позицияға ие, – деді Гүлмира Серікбайқызы.
Ашылу салтанатында сөз сөйлеген Нархоз университетінің президенті Қанат Қожахметов халықаралық және ұлттық деңгейдегі бастамаларға университеттің елеулі үлес қосып отырғанын атап өте келе, конференцияда көпке жария болған тарихи оқиғаның құқықтың білім беру жүйесіндегі маңызы айрықша екенін негізге алды.
– Университет өзінің жылдар бойғы тарихында қоғам сұранысына сай түрленіп, білім мен ғылымдағы өзгерістерге бейімделіп келеді. Уақыт талабына қарай жаңарғанымен, олардың басты міндеті өзгеріссіз қалды. Бұл дегеніміз – жастарға терең білім беріп, оларды рухани-адамгершілік құндылықтар негізінде тәрбиелеу. Бұл қос мақсат – интеллектуалдық дамудың да, қоғамның тұрақты болашағының да негізі саналады. Біз бұл үдеріске белсенді қатысуды өзіміздің азаматтық әрі кәсіби міндетіміз деп санаймыз. Университеттің басты миссиясы – кәсіби мамандар даярлау арқылы азаматтық қоғамның дамуына серпін беру. Жастарды рухани-адамгершілік құндылықтарға тәрбиелеу университет үшін әрқашан басымдық болып қала береді. Біз азаматтық қоғамның білім мен көшбасшылық орталығына айналуымыз тиіс. Бүгінгі конференция – осы бағыттағы нақты қадам, – деді университет президенті Қ.Қожахметов.
Ерекше атап өтетін жайт, іс-шара барысында жиынға қатысушылар тарихи оқиғаның куәсі болды. Конференцияда Нархоз университетінің БҰҰ-ның «Академиялық ықпал» бағдарламасы бойынша №16 Тұрақты даму мақсаты аясында жаһандық хабтың төраға орынбасары мәртебесін ресми түрде иеленгені жайлы хабарланды.
– Біз жаһандық деңгейдегі маңызды жаңалыққа куә болдық. Нархоз университеті БҰҰ-ның №16 Тұрақты даму мақсаты аясында жаһандық хабтың төраға орынбасары мәртебесіне ұсынылды. Университетіміз әлемнің 330 оқу орнының ішінде бейбітшілік, әділетті қоғам орнату, тиімді институттарды қалыптастыру саласында өзіндік позициясымен танылды. Шынында, бұл – университет ішіндегі қарапайым жиын емес, тарихи тұрғыдан алғанда еліміз үшін маңызы зор іс-шара. Президент Қасым-Жомарт Тоқаевтың Алматы қаласының тұрақты даму мақсаттарының академиялық хабына айналу туралы ұсынысы биыл наурыз айында Нью-Йорктен ресми түрде қолдау тапты, – деді профессор Г.Сұлтанбаева.
БҰҰ Жаһандық коммуникациялар департаментінің өкілі, БҰҰ ҚР Ақпарат Бюросының басшысы Властимил Самек құттықтау сөзінде университеттің әлемдік хабтың төраға орынбасары мәртебесіне ие болуы – білім жүйесіндегі маңызы орасан жауапкершілік екенін жеткізді. Одан өзге Властимил Самек 2025 жылы 4 наурызда жарық көрген Алматыда БҰҰ Орталығын құру туралы бастаманың 152 мемлекет тарапынан қолдау табуы Орталық Азия үшін саяси-тарихи мәні бар жетістік екенін алға тартты.
Ғылыми жиында мемлекеттік органдардың қызметін цифрландыру және ашықтықты арттыру, қоғамдық институттардың тұрақтылығы, азаматтық қоғам институттарымен өзара іс-қимылдың құқықтық механизмдері сынды мәселелер ортаға салынды.
Конференция соңында ұлттық және мәдени құндылықтарды сақтау, сондай-ақ цифрлық этика мен гуманитарлық технологиялар арқылы мемлекет пен қоғам арасындағы сенімді арттыруға бағытталған жаңа бастамалар ұсынылды. Нархоз университетінде өткен халықаралық басқосу – өңірлік тұрақтылық пен дамуға жол ашатын жаңа бетбұрыстың көрінісі. Қазақстан мен Орталық Азия үшін маңызды бастамалар көтерілген жиын университеттің халықаралық ынтымақтастықтағы рөлін айқындай түсті.
Алтынай БАУЫРЖАНҚЫЗЫ,
Алматы қаласы