Бота Бурханова есімді жас келіншек былтыр жазда базардан алған қақталған балықты жеп, денсаулығынан айырылған. Ол журналист Жанар Байсемізоваға берген сұхбатында тағдырын күрт өзгерткен күн жайлы айтып берді.
Оның айтуынша, 3 тамыз күні балаларыммен базарға барған.
– Үйге келген соң балаларыма бермей, тек өзім жедім. Ертеңіне дене қызуым көтеріліп, құса бастадым. Бірақ аса мән бермедім", – дейді Бота.
Алайда келесі күні жағдайы күрт нашарлап, аяқ-қолы жансыздана бастаған. Ол шұғыл түрде ауруханаға жеткізіліп, бірден жансақтау бөліміне түскен.
"Дәрігерлер мені өледі деп ойлапты. Туыстарыма да солай айтқан. Аяқ-қолым қап-қара болып көгеріп кеткен. Қолдағы тамыр табылмай, мойныма ине салып, плазма мен наркоз жіберді. Сол сәттен бастап ми қызметі де әлсіреген", – дейді Бота.
Анасы қызының ауруханаға түскенін естіп, демалып жатқан жерінен елге оралған. "Египеттен ала келген зәмзәм суымен мені жуындырып, үздіксіз дұға оқыды. Содан кейін ғана жағдайым біртіндеп жақсара бастады", - дейді ол.
Дегенмен Қазақстандағы емдеу нәтижесіз болған соң, туыстары Ботаны шұғыл түрде Түркияға апарған. Дәрігерлер оның өмірін сақтап қалу үшін аяқ-қолын кесуге мәжбүр болған.
"Алақанымды аман алып қалу үшін ішімнен тері кесіп алып, тігіп берді. Аяқтарыма 11 сағатқа созылған ота жасалды. Қатты қарайып кеткендіктен, ампутация жасауға тура келген", – дейді ол.