Жақында алғаш рет Паралимпиада ойындары мен арнайы Олимпиада бағдарламасы аясында ат спорты бойынша Қарағанды облысы әкімінің ашық кубогы өтті. TURAN-EL спорт орталығының алаңында өткен жарыста тірек-қимыл аппараты және ойлау қабілетінде кінәрат бар 30-ға жуық шабандоз бақ сынасты. Оған Қарағанды, Шығыс Қазақстан, Қостанай, Ақтөбе және Маңғыстау облыстарынан, сондай-ақ Астана және Алматы қалаларынан спортшылар қатысты.
Бейімделген ат спортын дамыту Шығыс Қазақстан облысында басталды. Бұл қозғалысқа Қарағанды облысы да қосылды. Жарыс халықаралық стандарттар бойынша ұйымдастырылып, қатысушыларға қауіпсіз және жайлы жағдай жасалды. Спортшылар паралимпиадалық ат жарысының элементтерін көрсетті. Арнайы Олимпиада бағдарламасының шабандоздары үшін бейімделген маршруттар әзірленді.
Өскеменнен келген қонақ Юлия Яковлева иппотерапияның пайдасын атап өтті. Ол «Ақ Тай» мүмкіндігі шектеулі балаларға қолдау көрсету қорында жұмыс істейді. Ат спорты шабандоздардың диагнозына қарамастан мүмкіндіктері шексіз екенін көрсетеді. Жылқымен барлық бұлшық еттердің белсенді жұмыс істеуіне ықпал етеді.
– Ат үстінде отырған адамның барлық бұлшық еті қозғалыста болады. Тепе-теңдікті сақтау үшін салт мінген адам бойын жинауға, өзінің әрбір дене қимылын игеруге жаттығады. Ал ерекше балаларға ең керегі де осы жаттығу. Бір сөзбен айтқанда, жылқы – табиғи тренажер, – дейді Юлия Яковлева.
Айта кету керек, Қарағанды облысында иппотерапия сабақтары тегін, мемлекеттік әлеуметтік тапсырыс бойынша өткізіледі.
– Біз тұрақты түрде иппотерапиямен айналысатын спортшыларды таңдадық. Бұл турнирде бес шабандоз біздің облысымыздың намысын қорғады. Нәтижесінде, көшбасшылар арасында біздің спортшыларымыз бар екеніне қуаныштымыз, – дейді Қарағанды облысының иппотерапия жөніндегі нұсқаушысы және команданың жаттықтырушысы Амина Есина.
Жеңімпаздардың ұлттық құрамаға кіруге және одан әрі халықаралық жарыстарға қатысуға мүмкіндігі бар.
Иппотерапия жобасы облыс бойынша дами түспек. Алдағы күндері Теміртауда жылқымен өтетін сабақтар этноауыл базасында басталады, Балқаш пен Қарағандыда да осындай жобаларды іске қосу жоспарланған.
Әдебиет Белгібайұлы, Қарағанды облысы