Облыс әкімі Марат Ахметжанов AQMOLA өңірдің ғана емес, елорда маңындағы аумақтың да өндірістік әлеуетін арттыруға бағытталған маңызды жоба екенін айтты.
«Аймақ аумағында Қытай, Түркия және Қазақстан инвесторлары 7 ірі жобаны іске асырмақ. Атап айтқанда, Dalian Hesheng Holdings компаниясының бидайды терең өңдеу зауыты, «Terracottas» Astana Ceramic клинкер зауыты, YDA Group агрохимиялық кешені, «Қазақ мұнай және газ институты» сұйытылған табиғи газ зауыты және тағы басқа маңызды кәсіпорындар бар», – деді Марат Ахметжанов.
Іс-шараға Ауыл шаруашылығы министрі Айдарбек Сапаров қатысып, инвесторлар өз жобаларын таныстырды. Атап айтқанда, YDA компаниясының технологиялық серіктес өкілі бес бағытта дәрі-дәрмек өндірмек және бұл жобаға 230 млн доллар көлемінде инвестиция тартуды көздеп отыр. Сондай-ақ индус-
триялық аймақта жүзеге асатын жобаның бірі – құрылыс индус-триясына тың серпін беретін үш зауыттан тұратын кешен. Бұл жобаны іске асырып жатқан инвесторлардың 75 пайызы Сингапурдан, 25 пайызы Қытайдан келген. Компания өкілі Талғат Ләззятұлының айтуынша, кірпіш зауыты, алюминий, есік-терезе өндірісі және су өткізбейтін құрылыс материалдарын шығаратын рулон өнімдері бір кешенде тоғысады.
«Жалпы, 130 адамды жұмыспен қамтимыз. Зауыттар соңғы технологиямен жабдықталады, яғни аз адаммен көбірек өнім шығару мүмкіндігі бар. Басты мақсатымыз – сапалы отандық өнімді нарыққа шығару», – дейді Талғат Ләззятұлы.
Инвесторлардың Ақмола өңіріне қызығушылығының басты себептері ретінде елордаға жақын орналасуы, логистикалық тұрғыда тиімділігі және жергілікті әкімдіктің бизнесті қолдау жағынан ашықтығы аталды.
Ауқымды жобалардың шоғырлануы AQMOLA индустриялық аймағын ел экономикасының маңызды тіректерінің біріне айналдырмақ. Инвестицияның көлемі мен жобалардың бағыты – өңірдің өндірістік әлеуетін арттыруға зор мүмкіндік береді.
Баян МАХСЕТ, ЕҰУ студенті