Тұрғындар негізінен мұраға үйді аудару, жұмыстан заңсыз шығару, сондай-ақ алаяқтық мәселелері бойынша жүгінді. Мәселен ауыл тұрғыны Нұрбақыт Нұрәділқызы екі жыл бұрын алаяқтарға алданып қалыпты. Оның құқықтық сауаты жеткіліксіз болғандықтан істі аяғына дейін жеткізбеген.
– 2023 жылы iPhone ұялы телефонын әлеуметтік желі арқылы сатып алмақшы болып, алаяқтарға алдандым. Кейін полиция қызметкерлеріне жүгіндім. Алайда әлі күнге дейін тиісті органдардан мардымды жауап алған жоқпын. Бармаған жерім жоқ. Қоғамдық қабылдауға заңгер келетінін естіп, арнайы келдім, – дейді ол.
Осы мәселені адвокат Әміржан Кушаев өз қолына алып, сотқа арыздануға көмек беретін болды. Айта кету керек, «Құқықтық көмек» партиялық жобасы бойынша жыл басынан бері адвокат, нотариус, медиатор, заңгерлердің қатысуымен 5 қабылдау өткізілді. Қабылдауға 211 азамат өтінішпен жүгініп, оның 82-сі оң шешілді.