Шара жыл бойы атқарылған жұмыстардың қорытындысы ретінде ұйымдастырылып, жастарды ынталандыру, қолдау көрсету және болашақ кәсіби бағыт-бағдарын айқындауға бағытталды. Қалалық қоғамдық тамақтандыру және сервис колледжінің түлегі Еркебұлан Махмұтов жұмысшы мамандықтарын насихаттау мақсатында көптеген маңызды іс-шара ұйымдастырылғанын атап өтті.
– Жыл бойы түрлі байқау мен фестиваль өтті. Қазір біз Астана қаласында өтетін халықаралық деңгейдегі еуропалық «Euroskills Herning 2025» байқауына дайындық үстіндеміз. Алматы мен Астанадан екі үміткер таңдалып, оларды үлкен додаға дайындап жатырмыз. Бұл – біз үшін үлкен жауапкершілік әрі зор мүмкін-дік, – деді ол.
Жиын барысында білім алушылар марапатталып қана қоймай, өздерінің жобаларын да таныстыру мүмкіндігіне ие болды. Астана Политехникалық жоғары колледжінің студенттері арнайы жоба аясында өздерінің дипломдық жұмыстарын көпшілік назарына ұсынды.
– Бүгін біз бұл шараға колледжіміздің түлектері әзірлеген дипломдық жобаны алып келдік. Бұл жоба – кез келген өнімді жасап шығаратын зауыттың шағын макеті. Оның басты ерекшелігі – өндіріс процесі адамның араласуынсыз автоматты түрде жүреді. Яғни, сіз маркетплейс арқылы қандай да бір тауарға тапсырыс берсеңіз, бұл зауыт сіздің қалауыңызға сәйкес өнімді өздігінен жасап шығара-ды, – деді колледж директорының орынбасары Самир Керимов.
Биыл елордада Жұмысшы мамандықтар жылы аясында еңбек адамын дәріптеу мен қолдау бойынша бірқатар мазмұнды жоба жүзеге асты. Арнайы көрмелер, кәсіби байқаулар, семинарлар мен тренингтер ұйымдастырылып, студенттердің кәсіби шеберліктерін арттыруға мүмкіндік жасалды. Жастарға арналған бұл бастамалар олардың еңбек нарығындағы әлеуетін арттырып қана қоймай, қоғамда жұмысшы мамандықтарға деген көзқарасты оң бағытқа өзгертуге де ықпал етуде.
Ақбота Мұхтар, ЕНУ-дың 2-курс студенті