Тұрақты ашық диалог бар проблемаларды ашық айтып, оларды шешу жолдарын бірлесіп табуға мүмкіндік береді. Білім алу, медициналық көмек, мәдени демалыс пен спорт, жұмысқа орналасудың қолжетімділігі басты тақырып болды.
Жиында ақыл-есі бұзылған балаларға арналған арнайы мектеп ашу мәселесі шешілді.
– Дайындық жұмыстары жүргізілуде: кадрларды іріктеу, ата-аналармен байланыс, сыныптарды жинақтау жүргізілуде. Келер жылы Қарағанды қаласы білім бөлімінің №4 мектеп-интернаты базасында мемлекеттік және орыс тілдерінде ақыл-ойы бұзылған балаларға арналған төрт сынып ашылады: екі нөлдік және екі 1-сынып. Сонымен қатар Telegram арнасы жұмыс істейді, онда инклюзивті және арнайы білім туралы ақпарат алуға болады, – деді Қарағанды облыстық білім басқармасы басшысының орынбасары Мейіржан Сыздықов.
Сонымен қатар колледждерде ерекше білім беру қажеттіліктері бар студенттер үшін де жағдай жасалуда. Бұл санатқа жататын 117 түлек бар. Оларға жұмыс табуға көмек қолы созылмақ.
Айта кету керек, биыл Жоғары гуманитарлық колледж базасында ерекше балаларға арналған жазғы лагерь ашылды. Ол өзінің тиімділігін де көрсетті. Ата-аналар мұндай лагерьлердің көбірек болуын сұрайды.
– Теміртауда ата-аналардың өтініші бойынша аутизмге шалдыққан балаларға қолдау көрсету орталығын ашу жоспарланған. Жөндеуді қажет ететін үй-жай табылды, – деді Мейіржан Сыздықов.
Ерекше білім беру қажеттілігі бар балаларға арналған шығармашылық үйірмелер мен спорт секцияларын дамыту бойынша да жұмыстар жүргізілуде. Мысалы, Қарағанды, Шахтинск және Балқаш қалаларында балалар мен жасөспірімдер дойбы, шахмат, дартс, тоғызқұмалақ, бес асық және асық ату ойындарынан секциялар ашылады. Биыл Қарағандыда аутизм және психикалық бұзылулары бар балаларға және 18 жастан асқан балаларға арналған екі күндізгі орталық ашу көзделіп отыр. Сондай-ақ мүмкіндігі шектеулі жастарды әлеуметтік бейімдеуге бағытталған жоба әзірленді. Оған ата-аналармен жұмыс, жаттықтырушылар даярлау кіреді.
Кездесуде ата-аналар қолжетімді орта, денсаулық сақтау, иппотерапияны дамыту, бейімделген жүзу, инклюзивті хореографияға қатысты мәселелерді көтерді. «Үміт» оңалту орталығының жабдықтарын жаңарту қажеттігі туралы қоғам қайраткері Нияз Сүндетәлиев айтып өтті. Сондай-ақ мүгедек баланы бір ғана ата-ана тәрбиелеп отырған жағдайға қатысты мәселе көтерілді – ата-ана ауырған жағдайда баланы ешкімге қалдыра алмайды. Осындай жағдайда көмек сұрауға қандай да бір орталық, пансионат керек. Ермағанбет Бөлекпаев мәселенің маңызды, өте өзекті екендігімен келісті. Ықтимал нұсқаларды қарауды тапсырды.
Аймақ басшысы қамқорлығы үшін ата-аналарға алғыс айтты. Ол қала және аудан әкімдерін ерекше балалардың ата-аналарымен тұрақты байланыста болуға шақырды.
Әдебиет БЕЛГІБАЙҰЛЫ,
Қарағанды облысы