«Отандастар қорының» бастамасы шетелдегі қазақ балаларына арналған Jas Qazaq лагерінің шымылдығы түріліп, кішкентай демалушыларға қызметін бастап кетті. Аталған этнолагерь Бурабайдағы IQanat High School of Burabay базасында ресми түрде ашылып, шетелде тұратын этникалық қазақ балаларының басын қосты.
Іс-шараны Қазақстан Республикасы Сыртқы істер министрлігіне қарасты «Отандастар қоры» коммерциялық емес акционерлік қоғамы ұйымдастырды. Jas Qazaq лагері – шетелдегі қазақ балаларын тарихи Отанымен рухани және мәдени тұрғыда жақындастыратын бірегей жоба. Биылғы маусым – аталмыш жобаның бесінші рет өткізілуі. Бұған дейін 700-ден астам қандас бала қатысқан болса, биыл АҚШ, Түркия, Польша, БАӘ, Ресей, Моңғолия, Өзбекстан, Қырғызстан және Қытай елдерінен келген 150-ге жуық этникалық қазақ балалары келіп отыр.
Лагерь 7-20 шілде аралығында өтеді. Қатысушылар қазақ тілі, тарихы, салт-дәстүрі мен ұлттық ойындарды меңгеріп, киіз үй құру, атқа міну, домбыра тарту сияқты практикалық сабақтар арқылы ұлттық құндылықтарды жан-жақты игереді. Сонымен қатар еліміздің жоғары оқу орындарының қатысуымен өтетін білім көрмесіне қатысып, әртүрлі елден келген замандастарымен достық байланыс орнатады. Этникалық қазақ балаларына түрлі танымдық жобаны ұйымдастыру олардың атамекенін танып-білуіне оңтайлы мүмкіндік туғызуда.
«Отандастар қорының» вице-президенті Алибек Жұрқадам биыл лагерьге 150-ге жуық баланың қатысып жатқанын және алдағы уақытта қатысушылар санын арттыру, жобаны кеңейту жоспары бар екенін атап өтті.
«Бұл – шетелдегі қазақ балалары үшін ерекше әрі маңызды жоба. Олар атамекеніне келіп, ана тілін, мәдениетін, ұлттық болмысын жүрекпен сезінеді. Мұнда балалар тек демалып қоймай, өз тамырын тереңірек танып, рухани байып қайтады», – деді «Отандастар қорының» вице-президенті А.Жұрқадам.
Jas Qazaq лагері – Қазақстанның шетелдегі этникалық қазақтарға бағытталған мәдени-гуманитарлық қолдау саясатының жарқын көрінісі. Мәдени демалыс жобасы өскелең ұрпаққа қазақтың төл мәдениеті мен ұлттық құндылықтарын сіңіруді көздейді.
С. БЕГІМБАЙ