Жаңа медициналық нысанның ашылу салтанатына Батыс Қазақстан облыстық Денсаулық сақтау басқармасының басшысы Мадияр Утешов, Жаңақала ауданының әкімі Алпамыс Көшкінбаев, «AMANAT» партиясы Батыс Қазақстан облыстық филиалы атқарушы хатшысының орынбасары Афиза Семгалиева, медицина ардагерлері, мекеме басшылары және ауыл тұрғындары қатысты.
«Бұл жаңа медициналық пункт – Бірлік ауылының тұрғындарына медициналық қызметтердің сапасын жақсарту және қолжетімділігін арттыруға бағытталған маңызды жоба. Енді ауыл тұрғындары өз ауылынан шықпай-ақ заманауи әрі ыңғайлы жағдайда медициналық көмек ала алады», – деді «AMANAT» партиясы Батыс Қазақстан облыстық филиалы атқарушы хатшысының орынбасары Афиза Семгалиева.
Медициналық мекеме заман талабына сай құрал-жабдықтармен қамтамасыз етілген. Атап айтқанда, қабылдау бөлмесі, күндізгі ем қабылдау бөлмесі, емдеу бөлмесі, вакцинация кабинеті, туберкулезге қарсы кабинеті және физиотерапия кабинеті бар.
Жаңадан ашылған дәрігерлік амбулатория – Батыс Қазақстан облысындағы «AMANAT» партиясының «Халықпен бірге» сайлауалды бағдарламасының аясында жүзеге асырылған маңызды жобалардың бірі. Бұл қадам ауыл тұрғындарының денсаулығын жақсартуға, медициналық көмекке қолжетімділікті арттыруға бағытталған.
Елнар ЕЛТАЙ