АҚШ президенті Дональд Трамп Венесуэланың әскери ұшақтары америкалық әскери кемелерге жақындап, қауіп төндірсе, оларды атып түсіруге бұйрық беретінін мәлімдеді.
Бұл мәлімдеме Венесуэла ұшақтарының екі күн қатарынан Оңтүстік Америка жағалауындағы АҚШ кемесіне тым жақын ұшып өткенінен кейін жасалды.
Бұған дейін АҚШ әскери күші Венесуэладан есірткі тасымалдады делінген кемені соққыға алып, 11 адамның қаза тапқаны хабарланған.
Венесуэла президенті Николас Мадуро АҚШ айыптауларын теріске шығарып, елдің әрдайым диалогқа дайын екенін, бірақ «құрмет талап ететінін» айтты. Ол сонымен бірге АҚШ-ты режимді әскери қысым арқылы құлатқысы келеді деп айыптады.
Ал Трамп журналистерге берген жауабында Венесуэладағы «өте күмәнді сайлауларды» атап өтті, бірақ басты мәселе «оған қатысты емес» деді.
Қаңтарда қайтадан президенттікке келгеннен бері Трамп Латын Америкасындағы заңсыз есірткі айналымына қарсы шараларды күшейтіп келеді.