Конференцияның мақсаты – Шорға шайқасының жоңғар басқыншыларына қарсы күресте қазақ халқының жеңісіне қосқан үлесін ғылыми тұрғыдан саралау, отандық қолбасшылардың тарихи мұрасын зерттеу, әскери историографияны дамыту және жастарды әскери-патриоттық рухта тәрбиелеу.
Іс-шараға Парламент Мәжілісінің депутаттары Ерлан Саиров, Ермұрат Бапи, Парламент Сенатының депутаты Қайрат Тастекеев, өлкетанушы, педагог-зерттеуші Қайрат Айтқожин, мемлекет және қоғам қайраткері Төлеубай Рахымбеков, тарих ғылымдарының докторы Еркін Әбіл, сондай-ақ танымал тарихшылар, ғалымдар, педагогтер, дін өкілдері мен қоғам қайраткерлері қатысты.
Жиында сөз алған Парламент Мәжілісінің депутаты Ерлан Саиров ұлттық тарихты сақтау мен жаңғыртудың маңыздылығына тоқталды:
– Мемлекет басшысы тарихи сананы жаңғыртудың қажеттілігін бірнеше рет атап өтті. Шорға шайқасы – бұл ерліктің, қайсарлықтың және Отанға деген сүйіспеншіліктің жарқын үлгісі. Мұндай оқиғалар ұлттық рухты көтеріп, патриотизмді қалыптастырады әрі азаматтық бірегейлікті нығайтуға негіз болады, – деді депутат Саиров.
Конференция аясында архитектор Болатбек Мұхамадиев әзірлеген Шорға шайқасының 80 жылдығына арналған ескерткіштің жобасы таныстырылды.