Танымал Boxingscene.com бокс порталы бұрынғы әлем чемпиондары Геннадий Головкин мен Андре Уордтың рингте жолы түйіспей қалғанына өкініш білдірді, – деп хабарлайды Aikyn.kz сайты.
Головкин өзінің мансабында орта салмақта өнер көрсетсе, Уорд екінші орта және жартылай ауыр салмақ дәрежелерінде чемпион атанған.
«Аяқталмаған бокс текетіресі. Андре Уорд – Геннадий Головкин. Көп жылдық талқылау. Бір-бірімен ешқашан жолықпаған екі "прайм". Шеберлік пен қысымның қақтығысы. Қорғаныс пен қиратушы күштің айқасы. Егер бұл жекпе-жек шынымен өткенде, кім жеңер еді?»,-деп жазды порталдың X (бұрынғы Twitter) парақшасында.
Айта кетейік, кейбір жанкүйерлер Головкинді Уордпен жекпе-жектен қашты деп айыптап жүр. Дегенмен GGG-дің промоутері Том Лёффлер мұндай пікірлерді бірнеше мәрте жоққа шығарған.