Әсіресе, дарияның сол жағалауынан бой көтерген жаңа аудан өңірге келген мәртебелі меймандарға мақтанышпен көрсететін құтты мекенге айналды. Аумақтағы заманауи үлгіде бой түзеген әлеуметтік нысандар, спорттық-сауықтыру кешендері, қаз-қатар тізілген көпқабатты тұрғын үйлер, стадион, облыстық музей сынды көптеген сәулетті ғимарат атқарылып жатқан жоспарлы жұмыстардың жемісті болғанын байқатады.
Қызылорданың сол жағалауын сәні мен салтанаты келіскен көрікті мекенге айналдыру жобасы алғаш қолға алынғанда күмәнмен қараушылар аз болмады. Содан да болар, аумақтан алғашқы тұрғын үй кешендері пайдалануға берілген сәтте жаңа қалаға қоныс аударуға ниет танытқандар қарасы аз болды. Алайда үздіксіз жүргізілген құрылыс жұмыстарының нәтижесінде тұрғын үйлердің қатары артып, әлеуметтік осал топ санатына кіретін отбасылар, көпбалалы аналар, жас мамандар мен апатты үйлерде тұратын тұрғындарға жыл сайын жаңа пәтердің кілтін табыстау үрдіске айналды. Нәтижесінде, сол жағалауға қоныстанушылар қарасы қалыңдады.
Дей тұрғанмен, жаңа қаланың негізгі көшелері қырмызыдай құлпырып, жаңарған кейіпке енгенімен, тұрғылықты халқының толғақты мәселесі шаш етектен. Әсіресе, тұрғын үй аулаларын абаттандыру, жарықтандыруға қатысты мәселелері бір түйеге жүк боларлық. Бір ғана аталмыш шағын ауданның № 65 үй тұрғындары талай уақыттан бері өздерін толғандырған бірқатар түйткілдің түйіні тарқатылмай тұрғанын айтып, мұңын шағып отыр.
Негізінен, бұл тұрғын үйдің пайдалануға берілгеніне үш жылдан асып барады. Нақтысы, 2022 жылдың желтоқсанында баспаналары апатты деп танылған тұрғындарға осы аумақтан жаңа пәтерлер табысталған. Сол кезден бастап тұрғындарды тұрғын үй айналасындағы бірқатар кемшілік толғандырып келеді.
«2022 жылдың желтоқсан айының соңғы күндері осы үйді бізге салтанатты түрде табыстады. Әрине, қуанышымызда шек болмады. Апатты үйдің азабынан құтылып, жаңа да жайлы үйге қоныс аударғанымызға шексіз риза болдық. Бертін келе пәтеріміздің ішкі сапасын айтпағанның өзінде, үйдің айналасындағы абаттандыру, жарықтандыру жұмыстарынан көптеген кемшілік байқадық. Атап айтқанда, осы аумақтан өтетін Ғ.Мұхамеджанов көшесі мен оны кесіп өтетін шағын көшеге жарықтандыру жұмыстары қажет. Бұған дейін аталмыш көшелерге жарық бағаналары орнатылған. Бірақ үш жылдан бері жарықшамдар бірде-бір рет іске қосылған емес. Жергілікті әкімдікке бұл жайында талай айтылды. Үш жыл бойына тек құрғақ уәдемен шығарып салады. Нақты нәтиже болар емес», – дейді сол аумақ тұрғыны Айда Тұрманова.
Әсіресе, түн мезгілінде тұрғын үйлер аумағы қараңғылық құшағында қалады. Ең қиыны, ата-аналарды түскі ауысымда оқитын балаларының қауіпсіздігі алаңдатады. Әр күндерін қорқынышпен өткізіп келеді. Ал жауапты орындар тарапынан жарықтандыру жұмыстарын жүргізуге асығар емес деп ашынады. Бұған дейін орнатылған жарық бағаналарының үш жылдан бері қосылмау себебін де түсінбей жүр.
Сонымен қатар аяқсуға қатысты мәселе де асқынып тұр. Аталмыш аумаққа суағар да салынған. Бірақ осы кезге дейін оған бір тамшы су тамған жоқ дейді тұрғылықты халық.
«Бұл аймаққа қоныстанған халықтың қарасы қалың. Жыл санап бой түзеген тұрғын үйлердің де қатары артып келеді. Жаз мезгілінде әрбір тұрғынның өз аулаларын көркейтіп, көгалдандыруға ниеті бар. Бірақ оған аяқсу қолбайлау болып тұр. Егер аяқсу берілмесе, қыруар қаржыға не үшін лоток жүргізілген деген заңды сұрақ туындайды. Талай жылдан бері тамшы тамбаған арық жүйелерінің жағдайы да мәз емес. Дария дәл іргеден өтіп жатыр. Соған қарамастан, арыққа су жіберуге қандай кедергі болып тұрғанын түсінбей жүрміз. Бұдан өзге, жаз мезгілінде дария жағасында серуендейтін халыққа да жағдай қарастырылмаған. Жарықшамдармен қоса, арнайы орындықтар да қойылмай тұр», – деп мұңын шақты тағы бір тұрғыны Ұлмекен Жарымбетова.
Өз кезегінде сол жағалау халқын толғандырған мәселенің мән-жайын жауапты тараптан да сұрап көрдік.
«Қызылорда қаласының сол жағалауында салынған № 65 үйге баратын жолдағы жарық шамдарын іске қосу жұмыстары мердігер мекеме «Ақнұр Авто» ЖШС-ға тапсырылған. Осыған сәйкес мердігер мекемемен тиісті жұмыстар атқарылатын болады. Ал аяқсу мәселесіне келсек, қазір «Қызылорда тазалығы» мекемесімен аталған көшедегі арық желісі тазартылып, аяқсу жеткізу мәселелері қаралатын болады. Сонымен қатар көшелерге аялдама белгілерін орнату жұмыстары Қызылорда қалалық полиция басқармасының арнайы нұсқамасы арқылы жүзеге асырылады. Жолданған нұсқамалар бойынша аумақта тиісті жұмыстар атқарылатын болады. Жалпы, 2026 жылы Қызылорда қаласы аумағында жарықтандыруды қажет етілетін көшелер тізімі әзірленді. Осыған сәйкес жобалық-сметалық құжаттары дайындалып, бюджеттік өтінім жолданады. Соның негізінде қажетті қаражат көзі қаралғаннан кейін тиісті жұмыстар кезең-кезеңімен атқарылатын болады», – деп мәлімдеді Қызылорда қалалық әкімдігіне қарасты қалалық тұрғын үй-коммуналдық шаруашылық, жолаушылар көлігі және автомобиль жолдары бөлімінен.
Жалпы, тұрғылықты халық үш жылдан бері тасада қалып тұрған талап-тілектерінің жедел шешілуін тағатсыздана күтіп отыр. Ең бастысы, құрылыс жұмыстарының санына емес, сапасына мән беріп, мердігерлердің жұмыстары мұқият бақылауға алынуға тиіс деп есептейді.
Ербақыт ЖАЛҒАСБАЙ,
Қызылорда облысы