Түркістан облысы Сайрам ауданында 20 жастағы жігітті 25-30 адамнан тұратын топ соққыға жыққан, – деп хабарлайды Aikyn.kz сайты.
Туыстарының айтуынша, ол ес-түссіз жатқан кезде де оның басынан тепкен. Кейін жас жігітті елсіз жерге апарып тастап кеткен. Жақындары оны екі сағаттан кейін ғана тауып алған.
Туыстарының сөзінше, жанжал күндіз көкпар кезінде басталған. Кешке жігітті мектепке «сөйлесуге» шақырған, бірақ ол жерде оны бір топ адам күтіп тұрған. Ол шамамен бір апта жансақтау бөлімінде жатқан, қазір палатаға ауыстырылған. Дегенмен әлі күнге дейін толыққанды сөйлеп, түсініктеме бере алмай отыр. Оның екі досы да жарақат алған.
Ата-анасының айтуынша, шабуыл жасағандардың қолында пышақ, тапанша және кастет болуы мүмкін. Олар ұлының қауіпсіздігіне алаңдаулы және өз сөздерінше, төбелеске қатысқандардың ешқайсысы қамауда отырмағанына наразылық білдіріп жатыр.
Түркістан облысының полициясы топтық төбелес дерегі бойынша екі күдіктінің ұсталғанын, бірақ кейін олардың үйқамаққа жіберілгенін хабарлады. Қазіргі уақытта тергеу жалғасуда.