Ыстамбұл қаласында Левент ауданында, Израиль консулдығы орналасқан ғимарат маңында атыс болды. Полицияның мәліметінше, бақылау бекетінде тұрған қызметкерлер көліктен ұзын қарумен түскен үш адамды байқап, тоқтауды талап еткен. Алайда күдіктілер бұл талапқа бағынбай, оқиға орнында атыс басталған.
Қақтығыс салдарынан үш шабуылдаушы залалсыздандырылды: біреуі оқиға орнында қаза тапса, екеуі жарақат алған. Сонымен қатар екі полиция қызметкері жеңіл жарақат алып, ауруханаға жеткізілген, олардың өміріне қауіп жоқ екені айтылды.
Оқиға орнына қосымша полиция күштері мен жедел жәрдем бригадалары тартылып, аймақта қауіпсіздік шаралары күшейтілді. Тергеу аясында тағы үш күдікті ұсталған. Құзырлы органдар оқиғаның себептері мен қатысушылардың байланысын анықтау жұмыстарын жалғастырып жатыр.