Ыстамбұл – бір-екі күнде көріп шығатын қала емес. Тарихы, мәдениеті, аудандары әртүрлі болғандықтан, оны толық сезіну үшін кемінде бірнеше күн қажет. Бұл есепте сапарды Астанадан бастап, екі ересек адамға арналған 5 күндік қарапайым, үнемді форматтағы саяхатты негізге алдық.
Алғашқы және ең үлкен шығын – ұшақ билеті. Астана – Ыстамбұл бағыты бойынша бір адамға екі жаққа билет орта есеппен 170–220 мың теңге аралығында болады. Екі адамға бұл шамамен 350–450 мың теңге шығады. Баға маусымға, алдын ала алуға және әуе компаниясына байланысты өзгеруі мүмкін.
Тұру мәселесінде қымбат қонақ үйлерді емес, эконом нұсқаларды қарастырдық. Қарапайым отельдерде немесе шағын қонақ үйлерде бір түннің бағасы шамамен 12–20 мың теңге. Бес түнге екі адамға 60–100 мың теңге жеткілікті болады. Ыстамбұлда мұндай нұсқалар көп, әсіресе туристік орталықтарға жақын жерлерде.
Тамақтану да үлкен шығын талап етпейді, егер қымбат мейрамханаларды таңдамаған жағдайда. Көшедегі тағамдар, шағын кафелер мен жергілікті асханалар арқылы күніне бір адамға 10–15 доллар көлемінде шығындалады. Екі адамға бес күнге шамамен 50–75 мың теңге жеткілікті.
Қала ішінде қозғалу үшін қоғамдық көлік ең тиімді. Метро, трамвай, автобус арқылы барлық негізгі орындарға жетуге болады. Istanbulkart арқылы төлеу ыңғайлы әрі арзан. Екі адамға бес күнге шамамен 10–15 мың теңге кетеді.
Көруге келсек, Ыстамбұлда тегін орындар өте көп: мешіттер, көшелер, жағалау, базарлар. Сонымен қатар кейбір танымал орындарға билет қажет. Мысалы, Топкапы сарайы, Галата мұнарасы сияқты нысандарға кіру ақылы. Екі адамға орта есеппен 20–40 мың теңге қарастыруға болады.
Жалпы есеп бойынша, екі адамға арналған 5 күндік сапардың құны шамамен 500 мыңнан 680 мың теңгеге дейін шығады. Бұл – үнемді форматтағы саяхат.
Қорытындысында айта кету керек, бұл тек жобалық есеп. Әр адам өз талғамына, демалыс стиліне және мүмкіндігіне қарай шығынды азайта да, көбейте де алады.