Алматыдағы сұлулық салондарының біріне қолына газ кілтін ұстаған, одан қан аққан ер адам кіріп барған. Бұл туралы заңгер Анна Чернова мәлімдеді, - деп хабарлайды Aikyn.kz
"Әкімші одан сыпайы түрде кетуін сұраған. Алайда ер адам: "Біреуді өлтіріп қойсам ше?" деп жауап берген. Қорқып кеткен қыз оған дәретхананың есігін көрсеткен. Ер адам жуынып, кейін салоннан шығып кеткен. Әкімші бірден 102 пультіне қоңырау шалған", – делінген жазбада.
Полицейлер салонға келген күдікті ер адамды ұстаған кезде оның жанынан арматура мен пышақ табылғанын мәлімдеді. Алматы қалалық полиция департаменті ер адамның жеке басы анықталып, жедел ұсталғанын хабарлады. Алдын ала мәлімет бойынша, ол мас болған.
"Ер адам дене жарақатын өзіне өзі салғаны анықталды. Видеодағы қан да өзінен аққан. Басқа адамдарға зиян келген жоқ. Ол айналасындағыларға қауіп төндірмеген", – деп хабарлады департамент.
Полиция оқиғаның мән-жайы жан-жақты тексеріліп, құқықтық баға берілетінін мәлімдеді.