Kyodo News агенттігінің хабарлауынша, Хоккайдода өткен қауын аукционында жаңа рекорд орнады.
Биылғы алғашқы аукционда бір жұп қауын 5,8 миллион иенге, яғни шамамен 17,2 миллион теңгеге сатылды. Бұл 2019 жылы тіркелген 5 миллион иендік, яғни шамамен 14,85 миллион теңгелік бұрынғы рекордтан жоғары.
Биыл Хоккайдодағы Юбари қаласының символына айналған қымбат қауындар аукционын жеміс-жидекке қатысты компания өткізді. Жүлдені көкөніс көтерме саудасымен айналысатын Futami Seika компаниясы алды.
Кейін қауындар Keio Store компаниясына сатылды. Компания оларды жексенбіге дейін Токиодағы супермаркеттердің бірінде көрмеге қояды.
Юбари ауыл шаруашылығы кооперативінің мәліметінше, жергілікті фермерлер биыл шамамен 3086 тонна қауын жөнелтуді жоспарлап отыр. Оның жалпы құны шамамен 2,12 миллиард иенге, яғни шамамен 6,3 миллиард теңгеге бағаланады.
Жапонияда жоғары сапалы жемістер алғашқы аукциондарда өте қымбат бағаға сатылып жатады. Мұндай сатып алуларды компаниялар көбіне жарнамалық мақсатта пайдаланады.