Бұл туралы әлеуметтік желілердегі жарияланымдардан белгілі болды, – деп хабарлайды Aikyn.kz сайты.
Алтынай Жәкішева 1999 жылы дүниеге келген. Ол – модельдік индустрияда табысты еңбек етіп жүрген қазақстандық арулардың бірі. Қазіргі уақытта Ұлыбританияның астанасы Лондонда тұрып, халықаралық сән әлемінде өз орнын қалыптастырып келеді.
Алтынай әлемдік деңгейдегі сән көрсетілімдеріне тұрақты қатысып, бірқатар танымал брендтермен жұмыс істеген. Оның портфолиосында Chopard, Jimmy Choo, Adidas секілді халықаралық компаниялармен жүзеге асқан жобалар бар. Жас модельдің мансабы қарқынды дамып, сән индустриясындағы беделі артып келеді.
Ол тек модель ретінде ғана емес, заманауи, білімді әрі тәуелсіз қазақстандық қыздың жарқын бейнесі ретінде де көпшілік назарын аударып жүр. Алтынай өз еңбегі мен талантының арқасында жетістікке жетіп, қоғамдағы қалыптасқан стереотиптерден тыс өзіндік жолын қалыптастыра білді.
Алтынайдың әкесі Мұхтар Жәкішев – Қазақстандағы белгілі кәсіпкерлердің бірі және «Қазатомөнеркәсіп» ұлттық атом компаниясының бұрынғы төрағасы. Ол 1963 жылдың 28 маусымында Алматы қаласында дүниеге келген. Мәскеу инженерлік-физика институтын инженер-физик мамандығы бойынша тәмамдап, кейін аталған оқу орнында аспирантурада білім алған.
Еңбек жолында түрлі коммерциялық құрылымдарда басшылық қызметтер атқарған. Атап айтқанда, Butya, «Заңгар», «Алаутрансгаз» компанияларында жұмыс істеп, кейін Қазақстан Республикасы Энергетика және минералдық ресурстар министрінің орынбасары қызметін атқарған.
1998 жылдан бастап «Қазатомөнеркәсіп» жүйесінде еңбек етіп, 2002-2009 жылдары ұлттық атом компаниясын басқарды. Бұл кезең Қазақстанның уран өнеркәсібінің қарқынды дамуымен ерекшеленеді.
2009 жылы Мұхтар Жәкішев қамауға алынып, кейін бірнеше қылмыстық бап бойынша 14 жылға бас бостандығынан айырылған. Бұл іс Қазақстандағы ең резонансты сот процестерінің бірі ретінде қоғамда кеңінен талқыланды. 2020 жылдың наурыз айында ол шартты түрде мерзімінен бұрын босатылып, түрмеде шамамен 11 жыл отырған. Мұхтар Жәкішев – көпбалалы әке. Оның балаларының қатарында Айгерім, Айсұлу, Алтынай, Айдай және Айтөре бар. Ал 2023 жылы отбасында тағы бір қыз бала дүниеге келген.