Депутаттар Қазақстан Республикасы Үкіметінің және Жоғары аудиторлық палатасының 2025 жылғы республикалық бюджеттің атқарылуы туралы есептерін талқылайды.
Биыл Үкімет есебі алғаш рет жаңа Бюджет кодексінің талаптарын ескере отырып жасалды. Мәліметтерге сүйенсек, Қазақстан экономикасы 2025 жылы 6,5 пайыз деңгейінде жоғары өсім көрсетті, бастапқы болжам 5,6 пайыз деңгейінде болған. Мұндай нәтижеге мұнай өндірісінің ұлғаюы, инвестициялық белсенділіктің жоғарылығы, ішкі сұраныстың өсуі, сондай-ақ құрылыс, көлік, сауда және өңдеу өнеркәсібінің жедел дамуы есебінен қол жеткізілді. Бұл ретте жаһандағы алмағайып ахуал мен әлемдік нарықтың құбылмалылығы сақталып отырғанына, бюджет жүйесін реттеудің жаңа жағдайларына бейімдеу қажеттілігіне қарамастан, Үкімет бюджет жүйесінің тұрақтылығын, әлеуметтік міндеттемелердің орындалуын қамтамасыз етіп, оң макроэкономикалық серпінді сақтап қалды.
Сондай-ақ күн тәртібінде Қазақстан Үкіметі мен Қырғыз Республикасының Министрлер Кабинеті арасындағы екі елдің елшіліктерінің мұқтаждықтары үшін Астана қаласы мен Бішкек қаласындағы ғимараттар мен жер учаскелерін, сондай-ақ Төтенше және Өкілетті Елшілердің резиденцияларын өзара өтеусіз пайдалануға беру туралы келісімді ратификациялау туралы заң жобасын қарау ұсынылады. Келісім нормаларында жер учаскелері мен жылжымайтын мүлікті беру тәртібі мен шарттары айқындалады.
Бұған қоса, екінші оқылымда депутаттар «Қазақстан Республикасындағы кедендік реттеу туралы» кодекске енгізілген түзетулерді және экологиялық мәселелер бойынша заңнамалық өзгерістерді қарайды.
Кеден кодексіне енгізілген өзгерістер оның нормаларын Еуразиялық экономикалық одақтың 2023 жылғы 25 желтоқсандағы Кеден кодексі туралы шартқа электрондық сауданы реттеу бөлігінде өзгерістер енгізу туралы хаттамаға сәйкес келтіреді.
Депутаттар бастамашы болған Экология мәселесі бойынша түзетулер саланы цифрландыруға, көміртекті офсетті регламенттеуге, қалдықтарды басқару жүйесін жетілдіруге бағытталып отыр. Құжат сонымен қатар Ұлттық гидрометеорологиялық қызметті жаңғыртуды, экологиялық реттеу мен бақылауды жақсартуды, басқа да бірқатар түзетуді көздейді.