Қазақстандық киберспорты Данил «molodoy» Голубенко өнер көрсететін FURIA командасы IEM Cologne Major 2026 турнирінің гранд-финалына жолдама алды.
Жартылай финалда FURIA түркиялық Aurora ұжымын 2:0 есебімен жеңді. Кездесудің үздік ойыншысы бразилиялық Юри «yuurih» Сантос атанды. Осылайша, molodoy соңғы төрт жылда мейджор турнирінің финалына шыққан алғашқы қазақстандық ойыншы болды.
Ол әлеуметтік желіде: «Бар назар – финалда. Мақсат біреу. Қолдау көрсеткен баршаңызға рақмет!» деп жазды.
Финалда FURIA Team Spirit пен Team Falcons арасындағы матчтың жеңімпазымен кездеседі.