Энергетика министрлігі Біріккен Ұлттар Ұйымының Даму бағдарламасымен (БҰҰДБ) бірлесіп цифрлық интеллектуалды электр желілерін дамыту және электр энергиясына сұранысты басқару тетіктерін енгізу жөніндегі жобалық бастаманы пысықтауға кірісті, – деп хабарлайды Aikyn.kz.
Астана қаласында Энергетика министрлігінің, БҰҰДБ-ның, KEGOC АҚ-ның, Мемлекеттік энергетикалық қадағалау және бақылау комитетінің өкілдері, сондай-ақ халықаралық және ұлттық сарапшылардың қатысуымен жұмыс кездесулері өтті. Іс-шара «Сұранысты басқару» (Demand-driven Digital Smart Grids) бірлескен жобасын әзірлеу аясында ұйымдастырылды.
Талқылаулар барысында электр энергиясы нарығындағы агрегаторлар институтын дамыту, тұтынушылардың цифрлық профильдерін қалыптастыру, тұтынушыларды сұранысты басқару бағдарламаларына қатыстыру үшін экономикалық ынталандыру тетіктерін енгізу, деректерді өңдеу мен қорғаудың заманауи жүйелерін пайдалану, сондай-ақ белсенді электр энергиясын тұтынушы тұжырымдамасын дамыту мәселелері қарастырылды.
Аталған тәсілдерді іске асыру энергия жүйесінің икемділігін арттыруға, ең жоғары жүктеме кезеңдеріндегі тұтынуды төмендетуге, жаңартылатын энергия көздерін, энергия жинақтау жүйелерін және өзге де заманауи энергетикалық технологияларды тиімді интеграциялауға мүмкіндік береді.
Энергетика министрлігі интеллектуалды желілерді дамыту мен электр энергетикасын цифрландыруды саланы жаңғыртудың маңызды бағыттарының бірі ретінде қарастырады. Сонымен қатар жоба энергиямен жабдықтаудың сенімділігін арттыруға, цифрлық инфрақұрылымды дамытуға және энергетика саласының киберқауіпсіздігін нығайтуға ықпал етеді.
Кездесулер қорытындысы бойынша тараптар жобалық құжатты әзірлеудің келесі қадамдарын айқындады. Бұл құжат Қазақстан Республикасының электр энергетикасын цифрлық трансформациялау саласындағы бірлескен бастамаларды іске асырудың негізі болмақ.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.