Палата Спикері бұқаралық ақпарат құралдарының қоғамдық ақпараттық күн тәртібін қалыптастырудағы және елімізде жүзеге асырылып жатқан реформалардың мәні мен мазмұнын халыққа түсіндірудегі айрықша рөліне тоқталды. Сондай-ақ ол қазіргі геосаяси сын-қатерлер мен жасанды интеллект қарқынды дамып жатқан кезеңде журналистердің қызметі жай ғана ақпарат таратумен шектелмейтінін атап өтті. БАҚ өкілдері бүгінде мемлекет пен қоғам арасындағы өзара сенім мен ашық диалогтың маңызды көпіріне айналып отыр.
Сонымен қатар Мәулен Әшімбаев Сенат Мемлекет басшысының бастамасымен қолға алынған реформаларды заңнамалық тұрғыдан қамтамасыз ету бағытында жүйелі жұмыс жүргізіп келе жатқанын айтты. Бұл ретте палата бұқаралық ақпарат құралдарымен ашық әрі тығыз ықпалдастыққа басымдық беріп отырғаны да сөз болды.
«Қазір Қазақстан дамудың жаңа кезеңінде аса маңызды тарихи сәтті бастан өткеріп жатыр. Президентіміз Қасым-Жомарт Кемелұлы Тоқаевтың бастамасымен жалпыұлттық референдумда жаңа Конституциямыз қабылданды. Осы үдерісте бұқаралық ақпарат құралдары айрықша рөл атқарғанын атап өткен жөн. Ашық пікірталастар, сараптамалар және телерадио эфирлері арқылы заңнамадағы әрбір норма тыңғылықты талқыланып, азаматтардың қолдауына ие болды. Сондай-ақ Конституциялық комиссия құрамында жұмыс істеген БАҚ өкілдері де бар. Мемлекет басшысы атап өткендей, олар Ата заңның тең авторларының біріне айналды», – деп, Мәулен Әшімбаев журналистерді кәсіби мерекелерімен құттықтады.
Айта кетейік, биыл «Парасат» байқауына қатысу үшін 150-ден астам өтінім келіп түсті. Байқауға телеарналар, радио, баспасөз басылымдары, ақпараттық агенттіктер, интернет-порталдар, сондай-ақ өңірлік және халықаралық бұқаралық ақпарат құралдарының журналистері қатысты.
Сонымен, байқау жеңімпаздары 6 аталым бойынша анықталды. «Үздік телевизиялық материал» аталымында Ирина Әлімжанова (Qazaqstan телеарнасы), Ердәулет Байдуллаев («Хабар» телеарнасы), Әлібек Рзабаев («Бірінші Еуразия» телеарнасы) жүлдегер атанса, «Мерзімді баспасөздегі үздік материал» аталымында «Время» газетінің ұжымы, Гүлзина Бектасова (Aiqyn газеті), Қарагөз Сімәділ (Ana tili газеті) үздік деп танылды.
«Интернет-басылымдағы үздік жарияланым» аталымында Руслан Ғаббасов («ҚазАқпарат» халықаралық ақпарат агенттігі), Рабиға Дүйсенғұлова (Tengrinews.kz ақпараттық агенттігі), Зарема Абдрахметова (BES.media ақпарат агенттігі) озып шықса, «Әлеуметтік желідегі үздік жарияланым» аталымы Сабина Садиева және Тимур Асылхановқа бұйырды.
«Жылдың үздік сараптамалық материалы» арнайы сыйлығын Боян Бркич (Euronews) еншілесе, «Парламенттік журналистиканы дамытуға қосқан үлесі үшін» арнайы сыйлығы Бану Әділжанға (Egemen Qazaqstan) табысталды.
Еңбегі еленген әріптестер мәртебелі жиын соңында Сенат Төрағасымен бірге естелік суретке түсті.