Қазақстанда 2027 жылдан бастап әлеуметтік жәрдемақылар мен төлемдерге бөлінетін бюджет 860 миллиард теңгеге оңтайландырылады, – деп хабарлайды Aikyn.kz сайты.
Үнемделген қаржы білім беру, денсаулық сақтау, ғылым және мәдениет салаларын дамытуға бағытталмақ.
Бұл туралы Премьер-Министрдің орынбасары – Ұлттық экономика министрі Серік Жұманғарин мәлімдеді.
Министрдің сөзінше, әңгіме әлеуметтік төлемдерді тоқтату туралы емес. Мақсат – мемлекеттік қолдауды шын мәнінде мұқтаж азаматтарға жеткізіп, бюджет қаражатын тиімді пайдалану.
Оның айтуынша, қазіргі кезде мемлекеттік бюджет шығындарының жартысынан көбі әлеуметтік төлемдерге жұмсалады. Соңғы алты жылда бұл сома 3 триллион 300 миллиард теңгеден 6 триллион 700 миллиард теңгеге дейін өскен.
Үкімет үнемделген қаражатты білім беру, денсаулық сақтау және ғылым салалары арқылы халықтың өмір сапасын жақсартуға бағыттауды жоспарлап отыр.