Қорғаныс министрінің бұйрығына сәйкес, биыл жоспарлы оқу-жаттығу жиындарына 3 мың әскери міндетті азамат шақырылады, – деп хабарлайды Aikyn.kz сайты.
Министрліктің мәліметінше, жиындардың мақсаты – запастағы әскери міндеттілердің жауынгерлік дайындығын жетілдіру, заманауи қару-жарақ пен әскери техниканы меңгеру және әскердің жұмылдыру дайындығын күшейту.
Әскери жиынға қатысушыларды жергілікті әскери басқару органдары іріктейді. Азаматтар шақыру қағазы арқылы хабарландырылады. Себепсіз келмегендерге 5 айлық есептік көрсеткіш (2025 жылғы мөлшермен 21 625 теңге) көлемінде айыппұл қарастырылған.
Бейбіт уақытта оқу-жаттығу жиындарына мына санаттағы азаматтар шақырылмайды:
оқу жылы кезінде педагогтер;
күндізгі бөлімде оқитын студенттер;
кәмелетке толмаған үш және одан көп баласы бар ата-аналар;
құқық қорғау және арнайы мемлекеттік органдардың қызметкерлері;
мемлекеттік және азаматтық авиация қызметкерлері;
егіс және орақ науқаны кезінде ауыл шаруашылығы саласының мамандары;
әскери міндетті әйелдер;
запасқа шығарылғанына екі жыл толмаған азаматтар;
қылмыстық іс бойынша тергеліп жатқан немесе сот қарауындағы адамдар;
Парламент және мәслихат депутаттары, сондай-ақ әкімдер.
Оқу-жаттығу жиындарының ұзақтығы бір айға дейін созылады. Осы кезеңде қатысушылар тамақпен, киім-кешекпен, медициналық қызметпен қамтамасыз етіледі. Жол шығынын Қорғаныс министрлігі өтейді.