Биылғы жылдың Қазақстан Республикасының Абай атындағы әдебиет пен өнер саласындағы мемлекеттік сыйлығын беру жөніндегі комиссиясы аталған сыйлықты алу үшін алдын ала іріктеуден өткен және конкурстың келесі кезеңіне жіберілген шығармалар тізімін ұсынды, - деп хабарлайды Aikyn.kz.
Соның арасында өнер саласы бойынша Қазақ ұлттық музыкалық драма театрының "Жошы хан" қойылымы бар.
«Жошы хан» тарихи драмасының авторы – Думан Рамазан. Белгілі жазушы бұған дейін «Кенесары – Күнімжан», «Абылай ханның арманы», «Керей – Жәнібек хандар» пьесаларын жазып, әдеби қауымның ыстық ықыласына ие болған еді. Ал қоюшы режиссері – Қазақстанның еңбек сіңірген қайраткері Болат Ұзақов. Автор мен режиссердің тандемі тарихи сананы қайта жаңғыртуға, көркемөнерді бүгінгі ұрпақ санасына жеткізуге өлшеусіз үлес қосады. Сондай-ақ спектакльге ерекше реңк беріп, шығарманың мазмұнын аша түскен оның музыкасы. Әуендерді композитор, этномузыкант, Қазақстан Республикасының мәдениет қайраткері Еділ Құсайынов пен Қайрат Тоқымбетов жазған. Қойылымның суретшісі ретінде Ерлан Тұяқов арнайы шақырылса, хореографы – Салтанат Сұңғат, сахна сайысын Абылай Салимханов қойды. Жалпы, шығармашылық топ аянып қалмаған. Сахнаға эскалатор жүргізілген, фон 3D графикамен әрленген, тіпті қағанның айбарын көрсететін тақ та ерекше әрленген. Кезінде осындай соңғы үлгідегі техникаларды пайдалану үшін театрлар қыруар қаржыға шетелден режиссер алдыратын еді. Ал «Жошы ханда» өзіміздің режиссерлер мен мамандар қалыптасқан стереотипті бұзып, қазақ театрының мүмкіндіктерін тағы бір рет паш етті.
Шыңғыс ханды Асылбек Қапаев шынайы сомдаған. Бұған дейінгі спектакльдерде Шыңғыс ханды тек қатыгез жағынан көрсек, бұл жолы қарттықтың қайнарына жетіп, кемелденген әке образында көбірек танимыз. Қойылымда Шыңғыс хан ұлдары арасындағы алауыздықты шешіп, сыртқы жаулардың қитұрқы ойларының жүзеге асуына жол бермеуге тырысады. Шыңғыс ханның өз қарамағындағы жерлерін төрт ұлына беріп, ұлыстарға бөлу сахнасы арқылы оның көрегендігі мен сарабдал саясаткерлігі байқалады. Заңғар таулардан асып, терең теңіздерді кешіп, таралғы созылғанша, үзеңгі қажалғанша тыным таппай, қаншама халықты қарамағына қаратып, бір ұлысқа ұйыстырған хан әке мен оғлан Жошының ел билеу жөніндегі ой ерекшеліктері, талғам-түйсіктері бой көрсетеді.
Материалды толығырақ мына сілтемеден оқи аласыздар.
Өнер саласы бойынша сонымен қатар Қазғұлов Алпысбай – «Ұлы дала әуендері» картиналар топтамасы, Әбілтай Шәміл – «Тұран – Алтын Орда - Қазағым» күй трилогиясы, Баймен Батухан картиналар топтамасы іріктелген.
Әдебиет саласы:
Ыбыраев Маралтай – «Ақ батпырауық» жыр кітабы
Бегманов Қасымхан – «Құланиек, құба таң» жыр кітабы
Тұрғынбекұлы Серік – «Жүрегім – мұңның ұясы» кітабы