Бірі тұрақты жұмысқа орналасса, енді бірі өз кәсібін ашқан. Ал кейбіріне арнайы жабдықталған жұмыс орындарында еңбек етуге мүмкіндік берілген. Өңірде мүмкіндігі шектеулі жандарды жұмысқа орналастырып қана қоймай, олардың жұмыс орнында орнығуына және кәсіби тұрғыда бейімделуіне жағдай жасайтын бағдарламалар да кеңейтіліп жатыр.
Облыстық Жұмыспен қамту және әлеуметтік бағдарламалар басқармасының басшысы Ғалымжан Спабековтің айтуынша, өңір мүмкіндігі шектеулі жандарды жұмыспен қамту көрсеткіші бойынша республикада көш бастап келеді.
– Биыл жұмыспен қамту шараларына 1 400-ге жуық мүмкіндігі шектеулі азамат тартылды. Олардың бір бөлігі бос жұмыс орындарына орналастырылса, енді бірі «Күміс жас», «Алтын жас» бағдарламаларына және жастар практикасына қатысып жатыр. Бұдан бөлек, мүмкіндігі шектеулі азаматтарға және оларға күтім жасайтын адамдарға өз кәсібін ашуға мүмкіндік берген 58 грант берілді, – деді Ғалымжан Спабеков.
Өңірде квотамен бөлінетін және арнайы жұмыс орындарының саны артуда. Мұндай жұмыс орындары есту және көру қабілеті бұзылған, тірек-қимыл аппараты зақымданған, сондай-ақ психикалық даму ерекшеліктері бар азаматтарға ұсынылады. Соның бір мысалы – арнайы және формалық киім тігумен айналысатын «Дедал» ЖШС. Қазір мұнда екі мүмкіндігі шектеулі азамат тұрақты жұмыс істейді. Тағы жеті адам арнайы субсидияланатын жұмыс орындарында еңбек етеді.
Қарағанды қаласында JOB COACH жобасы аясында Тең мүмкіндіктер орталығы жұмысын бастады. Орталықта арнайы даярлықтан өткен мамандар, соның ішінде ымдау тілі маманы жұмыс істейді. Мұнда психолог кабинеті, сондай-ақ көру қабілеті және тірек-қимыл аппараты бұзылған адамдарға арналған арнайы компьютерлік орындар қарастырылған. Алғашқы айдың өзінде орталыққа 50 адам жүгінген.
Өңір басшысы бұл бағыттағы жұмысты жалғастырып, мүмкіндігі шектеулі жандарды жұмыспен қамту мәселесін тұрақты бақылауда ұстауды тапсырды.
– Еңбек етуге қабілетті, жұмыссыз мүмкіндігі шектеулі азаматтардың, оның ішінде белгіленген квоталар мен арнайы жұмыс орындарын құру арқылы жұмыспен қамтылуын қамтамасыз ету қажет. Жұмыспен қамту мүмкіндіктерін кеңейтіп, мүмкіндігі шектеулі жандар мен жұмыс берушілер арасында мемлекеттік қолдау шаралары туралы түсіндіру жұмыстарын жалғастыру маңызды. Бұл мәселелер тұрақты бақылауда болуға тиіс, – деп атап өтті Ермағанбет Бөлекпаев.
Әдебиет БЕЛГІБАЙҰЛЫ,
Қарағанды облысы