«Энергетикалық және коммуналдық секторларды жаңғырту» ұлттық жобасы аясында қалада бір мезгілде үш ірі жоба – №6 және №7 жылу магистральдарын, сондай-ақ «Құрылысшы» шағынауданындағы орамішілік желілерді қайта жаңарту жұмыстары жүзеге асырылуда. Жалпы қаржыландыру көлемі 6,2 млрд теңгені құрайды.
Орал үшін жылу желілерін жаңғыртудың маңызы зор. Қала инфрақұрылымының едәуір бөлігі ондаған жылдар бойы пайдаланылып келеді.
– Энергетикалық және коммуналдық секторларды жаңғырту – уақыт талабы. Жаңартылған инженерлік желілер тұрғындардың игілігі үшін ұзақ әрі сенімді қызмет етуі тиіс. Стратегиялық жобалар сапалы және белгіленген мерзімде аяқталуы керек, – деп атап өтті Батыс Қазақстан облысының әкімі Нариман Төреғалиев.
Ең ауқымды жобалардың бірі «Құрылысшы» шағынауданында жүзеге асырылуда. Мұнда ұзындығы 8,8 шақырым болатын орамішілік жылу желілерін ауыстыру көзделген. Жобаның құны шамамен 1,86 млрд теңге. Қолданыстағы желілердің тозу деңгейі жоғары – 82 пайыздан асады. Қайта жаңартудан кейін шамамен 14,5 мың тұрғынды жылумен қамтудың сенімділігін айтарлықтай арттыру жоспарлануда. Жұмыстар 2026-2027 жылдарға есептелген. Биылғы маусымда 4,4 шақырым желіні ауыстыру көзделген.
Тағы бір маңызды нысан – №6 жылу магистралі. Қайта жаңарту ұзындығы шамамен 1,9 шақырым болатын учаскені қамтиды. Мұнда диаметрі 530 мм жаңа құбырлар төселуде. Жоба деректеріне сәйкес, қолданыстағы магистральдің жекелеген учаскелерінің тозу деңгейі 88 пайыздан асқан, ал пайдалану мерзімі 30 жылдан көп болған. Қайта жаңарту аяқталғаннан кейін шамамен 22 мың тұрғын, 10 бюджеттік мекеме және 106 көппәтерлі тұрғын үй сапалы жылумен қамтамасыз етіледі. Сонымен қатар желінің тозу деңгейін 88 пайыздан 46 пайызға дейін төмендету күтілуде.
Облыс әкімі негізгі жұмыстарды жылыту маусымы басталғанға дейін аяқтауды тапсырды.
– Жобаны аяқтаудың нақты мерзімдерін белгіледік. Қабылдау кезінде ешқандай аяқталмаған жұмыс болмауы тиіс. Егер кемшіліктер анықталса, мердігер оларды жедел түрде жоюға міндетті. Бұл жұмыстың басты көрсеткіші – жылыту кезеңінде тұрғындарды тұрақты жылумен қамтамасыз ету, – деді Нариман Төреғалиев.
№7 жылу магистралінде де елеулі өзгерістер жүргізілуде. Ол 1987 жылы пайдалануға берілген, ал ондаған жылдық пайдалану барысында жекелеген учаскелер айтарлықтай тозған. Жоба аясында ұзындығы шамамен 1,8 шақырым болатын учаскені қайта жаңарту көзделген. Жұмыстардың құны шамамен 2,6 млрд теңгені құрайды. Қайта жаңарту аяқталғаннан кейін магистраль 24 әлеуметтік нысан мен 130 көппәтерлі тұрғын үйді жылумен қамтамасыз етуді жалғастырады.
Жылу желілерін жаңғырту – коммуналдық шаруашылықтағы ең қомақты қаржыны қажет ететін, сонымен қатар аса қажетті міндеттердің бірі. Ұлттық жоба 2025-2029 жылдары Қазақстанның энергетикалық және коммуналдық инфрақұрылымын жүйелі түрде жаңартуға бағытталған. Оның мақсаты – коммуналдық қызметтердің сенімділігі мен сапасын арттырып, өңірлердің тұрақты дамуына жағдай жасау.
– Өңірде 2025-2026 жылдары ұлттық жоба аясында жылумен жабдықтау саласына 6,2 млрд теңге бағытталды. Бұл инфрақұрылымды жаңартуға беріліп отырған елеулі ресурс. Біз оны барынша тиімді пайдалануымыз керек: жаңа желінің әрбір шақырымы нақты тұрғындардың, үйлердің, мектептердің, ауруханалардың және басқа да нысандардың сенімділігін арттыруы тиіс, – деді Нариман Төреғалиев.
Осылайша, қазіргі жаңғырту науқаны – жай ғана ауқымды құрылыс жұмыстары емес. Енді мердігерлер үшін екі негізгі талап маңызды – сапа және мерзімді кешіктірмеу.
Аида ҒАЛИЕВА,
Батыс Қазақстан облысы