Қазақстан тәуелсіздігінің 35 жылдығы қарсаңында жарық көрген кітапты жазуға үш жыл кеткен. Оған әр кезеңде Сыртқы істер министрі, елші және уақытша сенімді өкіл болған азаматтар туралы очерктер енген. Олардың қатарында Төлеутай Сүлейменов, Мырзатай Жолдасбеков, Қуаныш Сұлтанов, Бірғаным Әйтімова және Сағынбек Тұрсынов бар.
Гүлсім Еңсепова дипломатиялық қызметке журналистикадан келген. «Егемен Қазақстан» газетінде сегіз жыл еңбек еткен қаламгер кейін Сыртқы істер министрлігінде жұмысын жалғастырады. Германия, Венгрия және Беларусьтегі Қазақстан елшіліктерінде түрлі қызмет атқарған. Сондықтан кітап кейіпкерлерінің көпшілігін ресми өмірбаяны арқылы ғана емес, бірге істеген жұмысынан, күнделікті қарым-қатынасынан таниды.
– Бұл кісілердің барлығын өз көзіммен көрдім, бірге жұмыс істедім. Сондықтан олардың саяси портретін жасауды болашақ ұрпақ алдындағы аманатым деп қабылдадым. Дипломат болуды армандайтын жастар үшін бұл кітаптың берер өнегесі көп деп ойлаймын, – деді Гүлсім Еңсепова.
Тұсаукесерге қатысқан Қазақстанның тұңғыш Сыртқы істер министрі Төлеутай Сүлейменов алғашқы дипломатиялық өкілдіктерді ашу кезеңін еске алды. Ол автордың жас маманнан тәжірибелі дипломатқа дейінгі жолына тоқталып, еңбектің қазақ тілінде жарық көруін ерекше бағалады.
Іс-шарада ерекше тапсырмалар жөніндегі елші Ұлан Қасымбеков Сыртқы істер министрлігі басшылығының құттықтау хатын жеткізіп, авторға естелік сыйлық табыстады. Хатта елге қызмет еткен дипломаттардың өнегесін оқырманға жеткізудің ұрпақтар сабақтастығын нығайтудағы мәні атап көрсетілген.
Жинақ халықаралық қатынастар, саясаттану және журналистикаға қызығатын оқырманға да арналған. Өзі көрген, білген дүниелерді жастарға жеткізуді көздеген автор жаңа еңбектің оқу барысында да пайдасы тиеріне сенім білдірді.
Ә.МҰХАНБЕТ