Фестивальді қазақстандық Ұлттық ЮНЕСКО клубтары федерациясы мен Дүниежүзілік ЮНЕСКО клубтары мен қауымдастықтары федерациясы Almaty Museum of Arts музейімен бірлесіп жүзеге асырды.
2026 жылы фестиваль «ЮНЕСКО-ның материалдық емес мәдени мұрасын сақтаудағы және ілгерілетудегі әйелдердің рөлі» тақырыбына арналып, ЮНЕСКО-ның 80 жылдығына және Дүниежүзілік ЮНЕСКО клубтары мен қауымдастықтары федерациясының 45 жылдығына орай ұйымдастырылды. Байқауға әлемнің 54 елінен 3 пен 18 жас аралығындағы мыңдаған бала мен жас суретші қатысты. Қазылар алқасының шешімі бойынша финалға халықаралық қатысушылардың шамамен 400 жұмысы өтті. Олардың туындылары әйелдердің халықтардың дәстүрлері мен мәдени жадын сақтаушы ретіндегі маңызын ашып көрсетті.
«90-нан астам елдің 100 000-нан астам қатысушысын біріктірген THE PLANET OF ART өнердің жай ғана өзін-өзі таныту құралы емес, халықаралық диалог пен мәдени мұраны сақтаудың тетігі екенін дәлелдеді. Фестивальдің басты миссиясы – өз мәдениетін бағалап қана қоймай, әлемнің мәдени алуандығын құрметтейтін ұрпақ тәрбиелеу. Берік бейбітшілік өзара түсіністіктен басталады», – деп атап өтті Дүниежүзілік және Қазақстандық ЮНЕСКО клубтары мен қауымдастықтары федерацияларының президенті Болат Ақшолақов.
Жоба әлеуметтік сипатқа ие: барлық қатысушы әлеуметтік мәртебесі мен тұрғылықты жеріне қарамастан, өз талантын тегін көрсетуге және Қазақстанның жетекші өнер қайраткерлерімен жұмыс істеуге тең мүмкіндік алады. Бұл жобаға ресми серіктес – «Теңізшевройл», сондай-ақ TotalEnergies E&P Kazakhstan және Freedom Holding Corp компанияларының Freedom Шапағат корпоративтік қоры арқылы көрсеткен қолдауының арқасында мүмкін болды.
10-13 қазан аралығында фестиваль финалистеріне арнап Алматыда мазмұнды мәдени-білім беру бағдарламасы ұйымдастырылды. Бағдарламаға «Шымбұлақ» тау курорты – ЮНЕСКО клубының аумағындағы пленэрі кірді. Оған ЮНЕСКО клубтарының уәкілдері Айгерім Қарибаева мен Саян Байғалиев қатысты. Сондай-ақ қатысушылар Ә.Қастеев атындағы Қазақстан Республикасының Ұлттық өнер музейі мен Almaty Museum of Arts музейінде экскурсияларға қатысты.
«THE PLANET OF ART – 2026 фестивалінде біз әртүрлі тілде сөйлегенімізбен, өнер арқылы бір-бірімізді сөзсіз түсіне аламыз. Біздің мәдениетімізде «Әлем – сенің кенебің, ал сен – оның суретшісісің» деген нақыл сөз бар. Жас суретшілерге айтарым: армандарыңа адал болып, алға ұмтылудан қорықпаңдар! Еңбектерің мен шығармашылық жолдағы әрбір қадамдарың міндетті түрде өз бағасын алады», – деді фестивальдің 16 жастағы финалисі, Бруней-Даруссалам өкілі Тионг Инг Хо.
Алматыдағы қорытынды бағдарламаға 20 елден – Әзербайжан, Бруней, Мажарстан, Грекия, Грузия, Замбия, Үндістан, Кения, Қытай, Қырғызстан, Маврикий, Мексика, БАӘ, Польша, Ресей, Тәжікстан, Түрікменстан, Өзбекстан, Франция және Чехиядан келген 12-18 жас аралығындағы финалистер, сондай-ақ Қазақстанның 13 облысынан 13 жас суретші қатысты.
«Мұғалімім байқау туралы айтқанда, мен бірден қызығушылық таныттым: ЮНЕСКО клубтарының федерациясы мен үшін шынымен ауқымды ұйым. Біздің ата-бабаларымыздан қалған мұраны сақтап, оны келесі ұрпаққа жеткізуіміз керек деп ойлаймын. Өз тамырымыз бен мәдениетімізді ұмытпауымыз қажет», – дейді Атыраудан келген THE PLANET OF ART – 2026 фестивалінің 16 жастағы гранд-финалисі Әбілмансұр Айтжан.
Жобаның басты халықаралық оқиғасы – 2026 жылғы 10-17 қараша аралығында Париждегі ЮНЕСКО штаб-пәтерінде өтетін финалистер жұмыстарының көрмесі. Көрме Материалдық емес мәдени мұраның халықаралық күніне арналады. Оның аясында THE PLANET OF ART – 2026 фестивалінің «ЮНЕСКО-ның жанды мұрасы: әйелдердің рөлі» атты ресми альбомының тұсаукесері өтеді. Сонымен қатар 2026 жылғы 10 қарашада ЮНЕСКО штаб-пәтерінің басты сахнасында фестивальдің «Бірлік симфониясы» музыкалық циклінің VI гала-концерті ұйымдастырылып, оған әлемнің түрлі елдерінен келген жас музыканттар мен балет әртістері қатысады.
Фестиваль Қазақстан Республикасының ЮНЕСКО және ИСЕСКО істері жөніндегі Ұлттық комиссиясының, Қазақстан Республикасы Мәдениет және ақпарат министрлігінің және Алматы қаласы әкімдігінің қолдауымен өтеді.