Депутаттың айтуынша, педагог-ассистенттердің еңбек жүктемесі мен еңбекақысын есептеу тәртібін нақтылау қажет. Олар ерекше білім беру қажеттіліктері бар балалардың білім алуына, әлеуметтік ортаға бейімделуіне, өзіне деген сенімін қалыптастыруына және дербестік дағдыларын дамытуына көмектеседі. Сонымен қатар депутаттың мәліметінше, елімізде ерекше білім беру қажеттіліктері бар 237 мыңға жуық бала тіркелген болса, оларға сабақ беретін ұстаздардың саны, яғни білім беру ұйымдарындағы педагог-ассистенттердің саны 6,5 мың адам.
– Бұл жай ғана статистика емес. Бұл мыңдаған баланың тағдыры мен болашағына деген ортақ жауапкершілік. Педагог-ассистент баланың жанында жай ғана жүретін қызметкер емес. Ол – ерекше баланың білім алуына, әлеуметтік ортаға бейімделуіне, өзіне деген сенімін қалыптастыруына және дербестік дағдыларын дамытуына кәсіби қолдау көрсететін маман. Алайда бүгінде педагог-ассистенттердің еңбек жүктемесі мен еңбекақысын нормативтік реттеу мәселесі толық шешімін таппай отыр, – деді А. Балташева.
Қолданыстағы қағидаларда педагог-ассистенттердің лауазымдық міндеттері мен біліктілік санатына байланысты қосымша ақы қарастырылған. Дегенмен депутат апталық нормативтік оқу жүктемесі мен жұмыс уақытын есептеу тәртібін нақтылау қажет екенін атап өтті.
Сонымен қатар депутат «Әділет» партиясының «Инклюзия: өзгелермен тең өмір сүріп, еңбек ету» бағдарламасында азаматтардың өзгелермен тең дәрежеде білім алуына, еңбек етуіне және қоғам өміріне белсенді қатысуына жағдай жасау көзделгенін айта келіп, «Әділет» фракциясы атынан Оқу-ағарту министрлігіне бірнеше ұсыныс жолдады.
– Біріншіден, «Педагог мәртебесі туралы» заңның талаптарын ескере отырып, педагог-ассистенттердің аптасына 16 сағаттық нормативтік оқу жүктемесін және оны құқықтық тұрғыдан нақты бекіту мүмкіндігін қарастыруды, қаржылық негіздеме әзірлеуді ұсынамыз.
Екіншіден, баланы тікелей сүйемелдеу уақыты мен сабаққа дайындалу, педагогтермен бірлесіп жұмыс істеу, құжаттама жүргізу сияқты өзге кәсіби міндеттерге жұмсалатын жұмыс уақытын нақты ажыратып, есепке алу тәртібін белгілеу қажет. Үшіншіден, педагог-ассистенттердің еңбек жүктемесі мен еңбекақысын есептеудің республика бойынша бірыңғай тәртібін қамтамасыз етуді ұсынамыз, – деді депутат.
Тілекгүл ЕСДӘУЛЕТ