Мемлекет басшысы Қасым-Жомарт Тоқаев Twitter парақшасында: «Жезтаңдай әнші, Еңбек ері Роза Рымбаеваның онлайн концерті – халықтың рухын көтеретін нағыз өнер туындысы. Әлем елдеріне үлгі боларлық дүние. Розаға және барша мәдениет қайраткерлеріне халықпен бірге болып, шығармашылығымен қолдау көрсеткендері үшін алғыс айтамын» деп жазды.
Қазақтың аяулы әншісі, Еңбек ері Роза Рымбаева «Карантиндегі жұлдыз» жобасына қатысып, көрермендерімен онлайн кездескен еді. Қазақстандық мәдениет және спорт ұйымдары жарияланған карантин жағдайында көрермендер мен жанкүйерлерден алыстамай, онлайн-кеңістікті қарқынды игеруде.
Мәдени іс-шараларды өткізуге қойылған уақытша шектеулер әртістер үшін жаңа мүмкіндіктерге жол ашты. Карантин кезінде адамдардың басым көпшілігі әлеуметтік желілерді белсенді пайдаланатынын ескере келе, өнердің қолжетімділігін баршаға қамтамасыз ету мақсатында Мәдениет және спорт министрлігі және «Қазақтелеком» АҚ Live форматындағы «Карантиндегі жұлдыз» атты жаңа жобаны бастаған еді.
Қазақстандық әртістер онлайн форматта «Қазақтелеком» АҚ-ның telecomkz YouTube арнасы арқылы өздерінің онлайн концертін ұсынып келеді. Сондай-ақ бұл концерттер Мәдениет және спорт министрлігінің Facebook және Қазақконцерттің @qazaqconcert YouTube парақшаларында қайталанады. Өнерсүйер қауым әртүрлі бағыттағы – фольклорлық, эстрадалық, классикалық және аспаптық концерттерді тамашалай алады. Концерт барысында тыңдармандар өнер жұлдыздарымен тікелей сұхбаттасып, ой-пікірлерін білдіруде. Бұл концерттердің тағы бір айырмашылығы – тегін әрі баршаға қолжетімді.
Жобаның алғашқы онлайн концерті 23 наурыз күні сағат 21.00-де Тelecomkz YouTube арнасынан көрсетілді. Бұл кеште қоңыр даусымен, жүрекке жылы үнімен, әсем әуенді әндерімен көрерменнің ықыласына бөленген өнер иесі Жұбаныш Жексенұлы өнер көрсеткен еді. Одан кейін көрермендер онлайн-кеңістікте Жеңіс Сейдоллаұлының өнерін тамашалады. Бұдан бөлек, Мәдениет және спорт министрлігінің бұл бастамасын театр ұжымдары да қолдап, онлайн байланысқа шыға бастады.
Мұхтар Әуезов атындағы академиялық драма театр онлайн спектакльден бөлек, Live форматында Instagram және Facebook әлеуметтік желілерінде тікелей эфирде арнайы сырласу сағаттары мен сұхбаттар ұйымдастырып жүр. «Абай мұрасы» – Ұлы Абайдың 175 жылдығына арналған сырласу сағатында актерлерге сауалдар қойып, сұхбаттасуға мүмкіндік бар.
