Елордада карантинде жатуы тиіс азаматтарға 8 жатақхана дайындалды. Олардың вирус жұқтырмағаны анықталғаннан кейін ғана азаматтар үй карантиніне жіберіледі. Дәл қазір осындай қатаң шараларды қабылдамасақ, нәтижеге қол жеткізе алмаймыз. Бұл жөнінде Нұр-Сұлтан қаласының әкімі Алтай Көлгінов мәлімдеді.
Әкімнің айтуынша, қаладағы дезинфекцияға 500-ге тарта адам тартылған, олардың жартысы Қарулы Күштің әскерлері.
«Қалғаны біздің мамандар және дезинфекциямен айналысатын арнайы компанияның өкілдері. Ең бірінші кезекте біз инфекция ошағын өңдейміз. Мәселен, қазіргі таңда шаһарда 10 ұйым карантинге жабылған. Оның ішінде, №1 автобус паркі барын білесіздер. Сонымен қатар карантинге жабылған нысандардың ішінде жатақханалар, екі медициналық ұйым бар. Біз ең бірінші кезекте коронавирус анықталған адамның үйіндегі подъезді тазаладық», – деді ол.
Қала басшысы, сонымен қатар дезинфекциялау жұмысы аялдамаларда, жаяу жүргіншілер жолында жүргізіліп жатқанын, сонымен бірге тұрғын үйдің кіреберісіне де аса маңыз беріп отырғанын айтты. Дезинфекция жасаушы арқасындағы 10 келілік жүкпен күні бойы жұмыс істейді. Мысалы, кешеге дейін астанадағы 1 900 кіреберіске дезинфекция жасалды. Бұл, шамамен 500-ге тарта үй екен. Дезинфекцияға қолданылатын препарат адам өміріне қауіпті ме?
«Бұл препараттар адам өміріне қауіпті болса, пайдаланбас едік. Бірақ бұл – антивирус. Сол себепті ол шашылып жатқан кезде аулақ болуымыз керек. Қауіпсіз дегенімізбен құрамында хлор бар. Бұл мәселеге де барлық қауіпсіздік нормасын сақтай отырып қарау керек. Сол себепті подъездерді өңдеу кезінде қала тұрғындарына үйден шықпауды сұраймыз», – деді әкім.
Алтай Көлгінов қаладағы «Ютари» компаниясының бетперде тіге бастағанын жеткізді. Сондай-ақ бүгінгі таңда бетперде кімдерге тегін таратылатынын айтты. «Біз бірінші кезекте Денсаулық сақтау министрлігімен және «СК-Фармациямен» бірге бетпердені медициналық қызметкерлерге, блок-бекетте еңбек ететіндерге, қаланы торуылдайтын патруль қызметкерлеріне, жедел жәрдем қызметкерлеріне және әртүрлі аурумен есепте тұрған азаматтарға тегін береміз. Осы адамдарға қазірдің өзінде 300 мың медициналық бетперде тегін таратылды», – деді ол.
Елордаға тағы 1 млн бетперде жеткізілгенін айтқан әкім әлі де бетперде жетіспеушілігі барын мойындады. «Әрине, жетіспеушілік сезіледі. Себебі адамдар әу баста бетпердені жаппай сатып алып кеткен. Қазір бір адамға 5 данадан ғана таратамыз. Шағын дәріханаларда бетперде бар деп айта алмаймын. «Еврофарм», «Гиппократ», «Биосфера» секілді дәріханалармен жұмыс істеп жатырмыз», – деді әкім. Айта кетейік, келесі аптада елордаға тағы да бетперде мен антисептик жеткізіледі.
Соңғы күндері азық-түлік бағасының өскені халықты алаңдатып отыр. Қымбатшылықтың алдын алу үшін қала бюджетінен әлеуметтік маңызы бар азық-түлік алу үшін 1 миллиард 300 миллион теңге бөлініпті. 6 мың тонна ұн, картоп, жуа, сәбіз және жармалар сатып алынған. Елорда әкімдігі мен уәкілетті министрлік азық-түлік бағасының шекті бағасын белгілепті, егер кімде-кім сол бағадан асырып сатса, жауапқа тартылады.
«Қазір жаңа астық жинағанға дейін маусымаралық кезең өтіп жатыр. Шекті бағалар белгіледі. Министрлік пен әкімдік белгілеген бағаларды кім көтерсе, мейлі ол кез келген базар, дүкен болсын, біз жауапқа тартамыз», – деді А.Көлгінов.
Ол тікелей эфир кезінде дәл қазіргі қиын кезеңде бір-бірімізді сынап, не бересің демей, мен қалай көмектесе аламын деуіміз керек екенін тілге тиек етті. «Мұндай жаппай карантин елде бұрын болмаған. Соны дұрыс сезіну керек. Егер бір-бірімізді қолдап, тәртіп сақтасақ, карантинді ерте бітіреміз. Ертерек жұмысқа тұруымыз керек. Үлкен жастағы адамдарымызды күтуіміз керек. Қазір бір-бірімізді сынайтын уақыт емес, қолдайтын уақыт. Жұмыла көтерген жүк жеңіл», – деді ол.
