12 сәуірде ОПЕК + келісіміне қатысушы елдердің министрлерінің өзара талқысы барысында ОПЕК + елдері мен ОПЕК-ке енбейтін елдердің мұнай өндірісін тәулігіне 9,7 млн баррельге ұжымдық қысқарту туралы келісімге қол жеткізілді.
Бұл - әлемдік мұнай өндірісі тарихындағы ең ірі ұжымдаса келісіп, мұнай көлемін қысқарту оқиғасының бірі. Қазақстан өз кезегінде келісімде консенсусқа қол жеткізіп, өндірісті тәулігіне 390 мың баррельге азайтуға міндеттеме алды. Бұл шешім бірінші кезекте мұнай нарығында ғана емес, бүкіл әлемде қалыптасқан қиын жағдайға байланысты болды, - деп хабарлады Энергетика министрлігі.
Коронавирус пандемиясына байланысты барлық елдерде мұнайға деген сұраныс күрт төмендеді, сондықтан ОПЕК хатшылығының өндірісті ұжымдық қысқарту туралы ұсынысы ақылға қонымды және уақтылы болып көрінеді.
Егер ОПЕК + мәмілесі жасалмаса, мұнай өндіруші елдер кез-келген жағдайда өндірісті қысқарта алар еді, өйткені нарықтың барлық ойыншыларының сақтау қоймалары шикізатқа лық толып, сондай-ақ сұраныстың жетіспеушілігімен онсыз да бетпе-бет келуде, қазір әлемде өндірілген мұнайдың мөлшері көп.
ОПЕК + мәмілесінің арқасында өндірісті ұжымдаса қысқартуға, жағдайды бақылауға алуға қол жеткізіледі, соның арқасында ол нарыққа оң серпін береді. Сарапшылардың пікірінше, бұл жайт мұнай бағасының өсуіне оң әсер етеді, сонымен қатар ұсыныстың арту проблемасын шешеді.
Қазіргі уақытта Энергетика министрлігі мұнай өндірісін азайту сценарийін әзірлеуде.
