Ешқайсысы да үстемеақысыз қалмайды
Сонымен алғашқы үстемеақыға қол жеткізгендер де бар. Алматыда коронавирусқа қарсы күреске тартылған медицина қызметкерлері алғашқы үстемеақы төлемдерін ала басталды. Жалпы алғанда, 1 тәуекел тобына 555 қызметкер, төлем сомасы – 375,1 млн теңге, 2 тәуекел тобына – 2 283 қызметкерге, төлем сомасы – 569,9 млн теңге, 3 тәуекел тобына – 874 қызметкерге, төлем сомасы 118,3 млн теңге берілді. Бұл санаттар туралы БАҚ-та егжей-тегжейлі айтылуда. Қазір көпшіліктің көңілін күпті еткен үстемеақы төлеу мәселесі бір жүйеге келген сыңайлы. «Әлеуметтік медициналық сақтандыру қоры» ҰАҚ Алматы қалалық филиалы директоры Нұрлыбек Қабдығапаровтың айтуынша, коронавирус инфекциясымен шаһардағы 15 денсаулық сақтау мекемесі жұмыс жүргізіп жатыр. Ал Мемлекет басшысының тапсырмасына сай эпидемияға қарсы іс-шараларға тартылған медицина қызметкерлерінің еңбекақысына үстемелер қосу үшін Атырау облысында 288,7 млн теңге бөлінген. Бұл үстемені қазір 350-ден астам дәрігер алды. Атырау облыстық №2 ауруханасына Атырау қаласында алғашқы науқас анықталған күннен бері дамыл көрмей, еңбек етіп жүрген медбике Айсұлу Масалимова: «Коронавирус індетінің қауіптілігіне сәйкес, ауруханамызда науқастар мен емдеуші дәрігерлер үшін барлық жағдай жасалған. Емдеуші дәрігерлерден бастап, медбике қызметін атқарушы біздің өзімізді арнайы қорғаныс киімдерімен жеткілікті қамтамасыз етті. Біздің қауіпті жағдайда еңбек етіп жатқанымызды ескеріп, жалақымызға үстемеақы төлеп, ынталандырып отырған Үкіметке ризамыз. Біз өз міндетімізді адал атқарып, індетпен жеңіске жеткенше күресіп, науқастарды емдеуге бар тәжірибемізді жұмсайтын боламыз» дейді. Ақтөбе облысында да жағдай қалыпты. Дәрігерлерді күпті еткен мәселе оң шешімін тауып жатыр. Облыстық Денсаулық сақтау басқармасы басшысы Әсет Асқарұлына қоңырау шалдық. «Мемлекет басшысының тапсырмасына сәйкес дәрігерлер өздеріне тиесілі үстемеақыға толығымен қол жеткізді. «Үстемеақы алмай қалдық» деген мәселелер туындап жатқан жоқ. Барлық ақпарат басқарма сайтында ашық көрсетілген» дейді.Дәрігердің алғысы шексіз
Ал Қызылорда облысында коронавирус инфекциясын жұқтырған қызылордалық мейірбике қазіргі таңда жұқпалы аурулар бөлімінде емін алуда. Еңбек және халықты әлеуметтік қорғау министрлігі белгіленген көмекті көрсететін болады. Одан бөлек, 1 тәуекел тобына 35 адам кіреді. Оларға қосымша 5,7 миллион теңге бөлінген. Ал екінші санаттағы 161 медицина қызметкеріне бөлінетін үстемеақы мөлшері – 20,5 млн теңге. Ал 3 санаттағы 179 адам қосымша 7,9 млн теңге алды. Оған Қазалы, Шиелі, Жаңақорған ауданаралық ауруханалар, облыстық медициналық жедел жәрдем стансасы, облыстық жұқпалы аурулар ауруханасы, облыстық фтизиопульмонологиялық орталығы кіреді.
Сондай-ақ Ақмола облысы провизорлық стационар медбикесі Ләззат Белялова екінші топқа, яғни «қауіптілігі жоғары» тобына кіреді. Ол өзінің үстемеақы алғанын, қазір карантинде болғандықтан, әлі тексеріп көрмегенін айтты. «Үстемеақы түсті деп, ұялы телефоныма хабарлама келді. Дәрігерлердің қызметін бағалап, осылай көмек көрсетіп жатқаны үшін алғыс айтамын» дейді.
Ал Жамбыл облысы бойынша COVID-19 инфекциясымен күресіп жатқан дәрігерлерге үстемеақы беріле бастады. 270 медицина қызметкері үстемеақыға ие болды. Олардың ішінде 40 дәрігер, 129 орта медицина қызметкерлері, 89 кіші медицина қызметкерлері және 12 жедел жәрдем жүргізушісі бар. Бірінші топқа, яғни «қауіптілігі аса жоғары» санатқа кірген 28 медицина қызметкерлері, екінші санатқа кіретін 37 дәрігер, 3 санаттағы 205 медицина қызметкерлеріне арнайы үстемеақы берілді. Жамбыл облыстық жұқпалы аурулар бөлімінің 4 ішек аурулар бөлімшесінің меңгерушісі Лиза Тұрғанова: «Дәрігерлерге белгіленген үстемеақыны алып, қуанышым қойныма сыймай отыр. Бұл біздің адал еңбегімізге беріліп отырған әділ баға деп білемін. Үкімет тарапынан көрсетілген мұндай қолдау жұмысымызға жігер беріп, қауіпті індетпен күресте әріптестеріме күш береді деп сенемін» дейді.
Алматы облыстық Денсаулық сақтау басқармасы жұқтыру қаупі топтарына сәйкес COVID-19 коронавирусымен күресу бойынша эпидемияға қарсы іс-шараларға қатысатын медицина қызметкерлерінің тізімін жергілікті медициналық мекемелердің ұсынысы бойынша қарастырды. Осы мақсатта республикалық бюджеттен бөлінген қаражаттан денсаулық сақтау ұйымдарының 1 448 қызметкеріне, оның ішінде 205 дәрігердің, 882 орта медициналық қызметкердің, 361 кіші медициналық қызметкердің еңбекақысына үстемақы төленді. Сонымен бірге облыс әкімінің қаулысын орындау үшін жергілікті бюджеттен 1 023 медицина қызметкеріне, оның ішінде 178 дәрігерге, 528 орта медициналық қызметкерге, 317 кіші медициналық қызметкерге сыйақы беруге де қосымша қаражат қарастырылды.
Сақтандыру төлемі қалай төленеді?
Біз бұл сауалды Денсаулық сақтау министрлігінің ресми өкілі Диас Ахметшәріпке қойдық. – Әлеуметтік желіде дәрігердің дерт жұқтыруына байланысты әртүрлі алыпқашпа сөздер көп. Тіпті «сақтандыру төлемін алу үшін дерт жұқтырып жатыр» деушілер де бар. Сонымен сақтандыру төлемі кімге беріледі? – Мұндай пікірлер біздің де құлағымызға жетіп жатыр. Яғни, дәрігер 2 миллион алу үшін осындай қадамдарға баруы мүмкін деседі. Жалпы, бұл миллиондар кімге тиесілі? Ол инфекциялық ауруханада коронавирус жұқтырған адамдармен тікелей жұмыс істеп жатқан дәрігерлерге беріледі. Ал егер дәрігер сыртта жүріп, біреуден жұқтырып алатын болса, оған бұл ақша тиесілі емес. Президент қаулысына сәйкес, 2 миллионды тек қана инфекциялық ауруханада күні-түні науқастарды аман сақтап қалу үшін күресемін деп, дерт жұқтырып алған дәрігерлер ғана алады. Қазір COVID-19 инфекциясын жұқтырған медицина қызметкерлері еліміздің 13 аймағынан тіркелді. Қазір 74 медицина қызметкері дерт жұқтырған. Олардың 20-сы Нұр-Сұлтанның карантин орталығында, провизорлық стационарда 10 дәрігер, инфекциялық ауруханаларда 44 дәрігер бар. Ішінде бір дәрігердің жағдайы ауыр болып тұр. Құдай сақтасын, дәрігер бұл дертті көтере алмай, көз жұмса, оның отбасына 10 миллион беріледі. Егер бұл дерттің қиындығын түсінсе, соның басы-қасында жүрсе, мұндай қадамға бара қоймайды. Сондықтан тағы да қайталап айтамын, коронавирус дерті – ойыншық емес. Ойнап-күліп, жазылып шығады деп те айтуға болмайды. Олар адам өмірін арашалап қалу үшін жанталасуда. Инфекциялық ауруханада дәрігерлер де, медбикелер де күндіз-түні еңбек етіп жатыр. Қанша қорғаныс киімін кигенімен, бұл ауа арқылы тарайтын індет болғандықтан, жүз пайыз ешкім кепілдік бере алмайды.Гүлшаһар БЕКЗАТ