Жер ұйығы Жетісуда өспейтін дақыл жоқ. Облыстағы әр аймақтың өзіне тән, жылдап өсіріп, баптап, мол тәжірибе жинақтаған егістік түрі бар. Мәселен, Қаратал, Балқаш аудандары күрішімен, ал Кербұлақ астығымен танымал. Райымбек картобымен елді мойындатса, Сарқан, Ескелді, Көксу, Ақсу қант қызылшасымен белгілі. Ал Алматының іргесінде орналасқан Қарасай, Іле, Талғар, Еңбекшіқазақ аудандарында өсімдік шаруашылығының барлық түрі дамыған. Жері – құнарлы, елі – еңбекқор.
Әлемді қауіпті індет әбігерге салып жатқанымен, алдағы күннің қамын ойлау, «қыс шананы, жаз сайлау» да естен шықпауға тиісті. Жұқпалы дерт етек-жеңін жиып, ауыздықталған соң да тірлік керек қой. Осыны есте ұстаған жетісулық шаруалар көктемгі дала жұмыстарына бел шеше кірісіп кетті. Ауа райының жауын-шашынды болуына қарамастан, егіс алқаптары қарбаласқа толы.
Еңбекшіқазақ ауданына қарасты 20 жылға жуық жүгерінің жоғары сортты тұқымын өсіріп, одан еселеп өнім алып жүрген «Будан» ЖШС-інің іс-тәжірибесі мен жеткен жетістіктері жұртқа кеңінен мәлім. Жүгері өсіруде тәжірибесі толысқан серіктестік Нұра ауылдық округінің аумағынан жүгері мен тұқымдық жүгері, бидай өсіруге мың гектарға жуық егіс алқабын алып, онда жергілікті тұрғындардың еңбек етуіне мүмкіндік жасап отыр.
– «Көктемнің бір күні – жылға азық» деп бекер айтпаған. Күн райының қолайсыздығына байланысты жер жырту мерзімін кешіктіріп алдық. Бірақ қол қусырып қарап отырған жоқпыз. Күнделікті алқап басындағы арықтар мен каналдың арнасын басып қалған қамыс-қурайдан тазартуға кірістік. Бұл жұмыстар тек қол күшімен атқарылады, – дейді «Будан» ЖШС Нұра ауылдық учаскесінің жетекшісі Айдар Атеев.
Енді біраз уақытта тұқым себіледі. Оны таңның атысынан кештің батысына дейін қарғадан қорғау да тынымсыздықты қажет ететін, бейнеті көп жұмыс екен. Тұқым өніп, көктеп шыққаннан кейін өскінді уақытылы суарып, күтіп-баптау жұмыстары да кезең-кезеңімен атқарылады. Жүгері учаскесіндегі жұмыстарға сырттан емес, ауылдың өз азаматтары жұмылдырылыпты. Дала аруын өсірудің қыр-сырына қанық диқандар күрек-кетпен, шалғы-қайрақтарын алып, каналды арнасын тазартуда. Ұзақты күн еңбек ететіндіктен, алқап басында бір мезгіл ыстық тамақ ұйымдастырылған.
Болат АБАҒАН,
Алматы облысы
