Қазақстан Республикасы президенттігіне кандидат А.Таспиховтың Жамбыл облыстық қоғамдық штаб мүшелері – сенімді өкілдер Б.Қараулов пен Г.Момбекова Жамбыл облыстық офтальмология орталығы ұжымымен кездесіп, сайлауалды үгіт-насихат жүргізді.
Ұжым мүшелеріне сенімді өкіл Б.Қараулов еліміздегі ең үлкен қоғамдық ұйым – Кәсіподақтар федерациясы ұсынған кандидат А.Таспиховтың тұғырнамасындағы көтерілген мәселелерді баяндап, әрқайсысына жеке-жеке тоқтала отырып, бүгінгі күнде олардың еңбек қоғамы мен еңбек адамы үшін қаншалықты маңызды екенін айтты.
Жиын соңында сенімді өкілдер еңбек ұжымын бірауыздан кандидат А.Таспиховты қолдауға шақырып, үгіт-насихат материалдарын таратты.
Аманкелді Таспиховтың Қызылорда облысындағы сенімді өкілдері М.Ықсанов атындағы Қызылорда политехникалық колледжінде кездесу өткізді. Қызылорда аумақтық кәсіподақтар бірлестігінің төрағасы Серік Сермағамбетов пен білім және ғылым саласы қызметкерлерінің облыстық ұйымы жетекшісі Райкүл Байназарова еңбек ұжымын А. Таспиховтың тұғырнамасында қаралған еңбекшілердің құқығы мен мүдделерімен таныстырды.
Ұжым мүшелері еңбек заңнамалары, ұжымдық шарт мәселесі, халықтың жұмыспен қамтылуы мәселелері бойынша кандидат А.Таспиховтың тұғырнамасында көтерілген сұрақтардың өзектілігін айтып, қолдау білдірді. А.Таспиховтың сенімді өкілдері кәсіподақ мүшелерін сайлауда белсенділік танытуға, кандидатты қолдауға шақырды.
Айдана БЕГІМ