Өзбекстандағы Сардоба су қоймасындағы апаттан Түркістан облысының бірқатар елді мекендерінің тұрғындарын эвакуациялау мәселесі қарастырылып жатыр, – деп хабарлады өңірлік коммуникация қызметі.
"Өзбекстан Республикасы ТЖМ шұғыл мәліметіне сәйкес, 2020 жылғы 1 мамыр күні сағат 20.15-те Сардоба су қоймасынан аққан су тоқтаған. Қазіргі таңда Мақтаарал ауданы әкімдігі Жантақсай ауылында орналасқан №16 орта мектепте шұғыл штаб құрып, Жаңа Жол ауылдық округінің 1900 тұрғыны бар Жеңіс елдімекенін және 320 тұрғыны бар Жаңа Тұрмыс елдімекендерін эвакуациялау мәселесі қарастырылуда", – делінген хабарламада.
Аталған елдімекендердің тұрғындарын Мырзакент ауылындағы «А. Пушкин», «Жаңа Жол», «С. Рахимов» атындағы орта мектептерде орналастырылады.
Түркістан облысы ТЖД мамандарының барлық күші, Мақтаарал, Жетісай аудандарының қызметкерлері оқиға орнына жұмылдырылды.
