Ойын бизнесі туралы заң жобасына депутаттар приципті мәні бар 150-ден аса түзету ұсыныпты. Бұл дерек Нұрлан Нығматулиннің төрағалығымен өткен Мәжілістің жалпы отырысында жария етілді. Мәселен, Үкімет «туризмді дамытуды» сылтауратып, Бурабай мен Қапшағай сыртында елде тағы 3 ойын аймағын құруды ұсынды. Бастаманы депутаттар бұғаттап тастады.
Мәдениет және спорт министрлігі Щучинскі мен Қапшағайдағы ойын аймақтарын азсынып, жобаға Алматы облысының Талғар және Панфилов аудандарында, соның ішінде «Қорғас» шекара маңы ынтымақтастығының халықаралық орталығы аумағында, сондай-ақ Маңғыстау облысындағы Каспий жағалауында жаңаларын ашуды енгізіпті. Мәжіліс оған қарсы үдере көтеріліп, бірауыздан тоқтау салды.
–Туризмді дамыту және бюджетті толықтыру қажет дегенді жамылып, ойынқұмарлықтың белең алуы үшін жағдай жасау жарамайды. Оның үстіне, ойын аймақтарын ірі мегаполистер мен облыс орталықтарына жақын жерде қаптатуға болмайды, – деді Н.Нығматулин.
Оның байламынша, туристік саланы өркендету үшін халықтың моральдық-психологиялық денсаулығын және қауіпсіздігін тәуекелге тігуге жол берілмеуі тиіс.
Бірінші оқылымда мақұлданған «Кейбір заңнамалық актілерге ойын бизнесі мәселелері бойынша өзгерістер мен толықтырулар енгізу туралы» заң жобасына сәйкес букмекерлік кеңселер мен тотализаторлар қолданыстағы екі ойын аймағына қоныс аудартылады. Дәл осы норма лоббистердің шабуылына ұшырады.
Мәжіліс төрағасы бұл бизнестің жабылмайтынын, тек енді жаңаша реттелетінін түсіндірді. Әйтпесе, мәселен, іргедегі алпауыт Қытайда, Иран, араб елдерінде, басқа да Ислам мемлекеттерінде букмекерлік кеңселер мен тотализаторлар қызметіне толық тыйым салынған. АҚШ-та букмекерлік кеңселерге Невада, Нью-Джерси штаттарындағы шектеулі территориялар мен бірқатар резервацияда ғана жұмыс істеуге рұқсат етілген.
Сонымен бірге онлайн букмекерлердің заңдастырылуы, бәсті есепке алу орталығын құру арқылы салықты әкімшілендірудің жақсаруы нәтижесінде бюджет толығады.
Нұрлан Зайроллаұлы бұл заң экономикалық жағдайға да, қауіпсіздік ахуалына да оң ықпал ететініне екпін түсірді.
Жиында палата депутаттары міндетті вакцинациялауды енгізетін «Халық денсаулығы және денсаулық сақтау жүйесі туралы» кодекс жобасын екінші оқылымда құптап, Сенатқа жолдады.
