Бір айлық мөлшер 40 минутта жауды
Түркістан облысындағы толассыз жауынның салдарын көбірек тартқан Төлеби ауданына ертесіне таңертең облыс әкімі Ө. Шөкеев келді. Облыс басшысы Төлеби ауданындағы селден зардап шеккен аумақтарды аралап, тұрғындармен кездесті. Оларды сабырға шақырып, бәрі реттелетінін жеткізді. «Бар-жоғы 40 минуттың ішінде 1 айлық жаңбыр жауған. Дәл мұндай жағдай бұрын-соңды болмаған табиғи құбылыс. Қауіпсіз аумаққа көшірілгендеріңіз дұрыс болды. Үйлеріңізді полиция қызметкерлері күзетеді. Уайымдамаңыздар. Саман үй құласа, өздеріңіз үшін қауіпті. Барлық аудандар осында көмекке келіп жатыр. Жарамсыз болған үйлер мен жөндеуді қажет ететін баспаналарды қайта қалпына келтіру жағы қарастырылады», – деді Өмірзақ Естайұлы.
Толассыз жауған нөсер жауынның әсерінен Төлеби ауданындағы өзендердің су деңгейі көтерілген. Соңғы ақпарат бойынша, арық-атыз, қыр-сайлардан жиналып аққан жаңбыр суы 6 елді мекендегі 260 тұрғын үйдің ауласына кірген. 27 үйдің құлау қаупі бар.
Төлеби ауданының судан зардап шеккен тұрғындары үшін алғашқылардың бірі болып Сайрам ауданынан гуманитарлық көмек жетті. Одан соң аудандық «Көкпар» федерациясынан, «Пионер» ЖШС-інен қажетті азық-түлік пен гигиеналық заттар келді. Қойма үшін Ленгер қаласындағы спорт мектебі бекітіліп, қазіргі таңда жан-жақтан көмек келуде.
Ленгер қаласының Сауран көшесі 221-үйде тұратын 72 жастағы Р.Тойметова әжейдің үйін де су басқан. «Үйде немерем екеуміз ғана болатынбыз. Кешкі 5-терде басталған қатты жауын әп-сәтте айналамызды алып кетті. 80-жылдардан бері осында тұрсам да дәл мұндай жойқын су шаю жағдайы болмаған еді. Екі қорамыз судың астында қалды. Ортада қалған үйіміздің ішіне тізеден су кірді. Әкімдікке алғысымыз көп, ерікті жастар үйден көтеріп алып шығып, автобуспен осында көшіріп әкелді», – дейді колледж жатақханасында жатқан кейуана.
Нөсер жауын шымкенттіктерді де әбігерге салды
Нөсер жауын шымкенттіктерді де айналып өтпеді. Таулы аудандағы бұл төтенше оқиға көрші жатқан Шымкент қаласының Тоғыс елді мекенімен қоса Елтай ауылына да жеткен. Шымкент қаласы Төтенше жағдайлар департаменті баспасөз қызметінің хабарлауынша, салдарынан 60 тұрғын үйдің ауласын су басып, 3 шаруашылық нысан құлады. Үйлерін су басқан тұрғындар №119, №41 мектептерде құрылған эвакуациялық пункттерге көшірілген. Шымкент қаласының әкімі қатты жауған жауын салдарынан су басқан Елтай тұрғын алабына келіп, тез арада тасқын зардабын жою және алдын алу жұмыстары жөнінде комиссия құруды тапсырды. Нөсер жауын қала шетіндегі ауылдарды ғана емес, орталық тұрғындарын да әбігерге түсіріп жатыр. Алайда мамандар алдағы 3 күнде толассыз жауын-шашынның болу қаупі бар екенін айтады.
Назгүл НАЗАРБЕК, Шымкент қаласы