Қазақстанда темекі өнімдері қымбаттады. 2020 жылдың сәуір айында баға 0,7%-ға өссе, бір жыл ішіндегі көрсеткіш – 12%. Өңірлер бойынша Шығыс Қазақстан облысында (3,2%), Павлодар облысында (2,5%) және Жамбыл облысында (2,1%) айтарлықтай жоғары баға тіркелді, – деп хабарлайды Ranking.kz.
Елімізде биылғы сәуір айында фильтрлі темекінің бір қорабының құны 465 теңгені құрады. Бұл былтырғы сәуір айындағы бағадан 2,7%-ға жоғары. Әсіресе, Семей қаласында темекі айтарлықтай қымбаттап, 478 теңгеге жетті. Павлодарда – 454 теңгеге (2,7%) және Таразда 471 теңгеге (2,4%) көтерілген.
Сондай-ақ сәуір айында фильтрлі темекінің жоғары құны Қостанайда (490 теңге), Ақтөбеде (488 теңге) және Нұр-Сұлтанда (485 теңге) тіркеліп, арзан баға Петропавл (439 теңге), Қызылордада (444 теңге) және Алматыда (447 теңге) белгіленді. Айта кетейік, 13 мамыр күні Парламент Мәжілісінің отырысында депутаттар елімізде темекіні 21 жасқа толмағандарға сатуға болмайтыны туралы заң жобасын мақұлдады. Заң жобасының бірінші оқылымы 4 наурызда қаралған болатын. «Қоғам мен депутаттар арасында қызу талқыланғаны – темекі тартуға қатысты профилактикалық әрі шектеу мәселелері бойынша нормалар болды. Депутаттардың түзетулерімен темекі сатып алу үшін жас аралығы шектеуі 18-ден 21 жасқа дейін жоғарылады», – деді депутат Зәуреш Аманжолова.
Оған қоса, темекі және темекі бұйымдарын сату жөніндегі заң талаптарын бұзғандарға әкімшілік айыппұл мөлшері 30-50%-ға ұлғайтылды. Депутат З.Аманжолованың айтуынша, автокөлікте балалар болған кезде темекі тартқандар үшін 10-нан 20 айлық есептік көрсеткішке дейін айыппұл көзделген. Халықаралық зерттеулер жыл сайын Қазақстанда темекінің кесірінен болатын аурулардан 23 мыңдай адам қайтыс болатынын айтады.
2019 жылы 7 айында Қазақстанда 8,1 млрд үштік темекі өнімдері өндіріліпті. Статистика комитетінің дерегінше, 2019 жылдың қаңтар-маусым айларында еліміз 117,1 млн долларға табак өнімдерін импорттаған. Ал дәл осы кезеңде экспорт 54,7 млн долларды құраған. Бізге келетін темекі импортының 90%-ы Ресейге тиесілі, қалған көлем Өзбекстаннан, Украина мен АҚШ-тан және Бразилиядан жеткізіледі. Ал өзімізде өндірілетін темекі өнімдерін Қырғыз Республикасына, Моңғолияға, Въетнам мен Тәжікстанға экспорттаймыз. Алматы облысында орналасқан екі ірі темекі өндіруші компания – «Филип Моррис Қазақстан» және «Джей Ти Ай Қазақстан» 2018 жылы бюджетке 159,4 млрд теңге түсім түсіріпті.
