Nur Otan партиясының Қызылорда облыстық филиалы Саяси кеңесінің кеңейтілген отырысы өтті.
Аймақтық филиал төрағасы Қырымбек Көшербаев билік органдарының қызметіне бақылау жасаудағы партияның шешуші рөлін атап өтті.
– Билік партиясы, ең бірінші, биліктің қызметіне сын көзбен қарауы тиіс. Уақытылы ескертіп, қажет болса тиісті шаралар қабылдауға мұрындық болуы керек, – деді Қырымбек Көшербаев.
Ол сондай-ақ тұрғындардан келіп түскен сұрақтардың мұқият қаралуын және орындалуын қатаң бақылауға алуды тапсырды. Арыз-шағымдарды жергілікті атқарушы органдар мұқият қарап, оның орындалуы мен мәселенің шешілуін қатаң бақылауға міндетті екенін де айтты. Талаптардың орындалуы туралы тоқсан сайын талдау жасалмақ. Облыс әкімі сырғытпа жауап пен сөзбұйдалыққа салған қызметкерлер мен лауазымды тұлғалардың тәртіптік жауапкершілікке тартылатынын да ескертті. Қажет болса партиядан шығару мәселесіне дейін қаралатынын да қатаң ескертті.
– Президент қарамағындағы қызметкер сыбайлас жемқорлықпен айыпталып, қылмысы дәлелденетін болса, оған тікелей басшы жауап беретінін айтты. Осы ұдайы естеріңізде болсын, – деді облыс әкімі.
Осыған байланысты аймақ басшысы сыбайлас жемқорлықпен күресті барынша күшейтуге бағытталған жұмыстарды жүйелі жүргізуді және сыбайлас жемқорлыққа қарсы іс-қимыл жөніндегі қоғамдық кеңес жұмысын жандандыру мақсатында қосымша ұсыныстар беруді тапсырды.
Сонымен қатар аз қамтылған отбасылардың балаларына ыстық тамақ пен қоғамдық көліктерде тегін жүру мәселесі мен масылдықтан арылу керегіне тоқталды.
– Облыстық білім басқармасына қала және аудан әкімдерімен бірлесе отырып, аз қамтылған отбасы балаларын тегін ыстық тамақпен және қалаішілік қоғамдық көліктерде тегін жүруін ұйымдастыруды тапсырамын. Сонымен қатар мектептегі асханаларды талапқа сәйкестендіру, тамақтану сапасын көтеру бойынша жұмысты жеделдету қажет.
Өкінішке қарай, қоғамдағы мына бір келеңсіз көрініс туралы да айтқым келеді. Бүгінде ұсынылған жұмыстан бас тартып, мемлекет тарапынан берілетін әлеуметтік көмекке қол жайып күн көруді әдет қылған адамдардың қатары азаймай тұр. Бұдан бөлек, өзі несие алып, қарызын қайтаруға келгенде құлықсыздық танытатын да азаматтар бар. Бұл барып тұрған масылдық психология! Мұндай ойды түбегейлі өзгерту керек, – деді Қырымбек Көшербаев.
Аймақ басшысы қоғам, ел дамуына кері әсер ететін кертартпа көзқарастан арылып, тынымсыз еңбек арқылы мемлекеттің өсіп-өркендеуіне атсалысу – әрбір азаматтың борышы екенін еске салды.
Миуа БАЙНАЗАР,
Қызылорда облысы