Алматыда жаңа 30 көпқабатты үй қисайып құлағалы тұр – видео
Алматыда жаңа 30 көпқабатты үй қисайып құлағалы тұр – видео
Фото: Интернеттен алынды
Телеарнаның хабарлауынша, бұрынғы Алғабас, қазіргі Зерделі ықшамауданында қисайған үйлер көбейген. Жылдар бойы баспана кезегіне тұрып, әупірімдеп жеткен пәтер бір күнде қирап қалуы мүмкін деген үрей тұрғындарда сейілер емес. Қасеновтер отбасы бұл баспананы 28 жыл күткен. Бірақ қазір қуаныштан гөрі, қирандының астында қаламыз ба деген қорқыныш басым екенін айтады.
Тұрғын Ерік Қасенов: «Қорқынышты, немеремізге қорқасың ертең бірдеңе болып қалса, түн ішінде бір жағдай болып қалса, жер сілкінсе жетінші қабаттан секіре алмайсың да, қалай қашып құтыласың?», – дейді.
Пәтер иелері коперативінің өкілі Дана Рахимова да осы көп қабатты үйде тұрады. Оның айтуынша, Зерделі ықшам ауданында 30 үйдің сапасы сыр берген. Қабырғадағы сызаттар ұлғайып, есік пен терезе жабылмай қалғандары да бар деді. Сондай-ақ, ықшам аудан тұрғындарының басым бөлігі әлеуметтік топ өкілдері екен.
Дана Рахимова, пәтер иелері кооперативінің өкілі: «Ықшамаудандағы барлық үй қисайған. Біреуі 5, екіншісі 10, тіпті кейбіреуі 30 сантиметрге дейін қисайғандары бар. Ал, біздің үй 20 сантиметрге шалқайып кеткен. Негізі 15 сантиметрден асса қауіпті саналады. Сондықтан біздің мұндағы әр сәтіміз қазір қауіпті. Әкімдікке айтып, шаршадық. Үйдің іргетасын бекіту жұмыстарын уақытша тоқтатып тастапты», – дейді.
Қала билігі жағдайдан хабардар. Олар мұндағы келеңсіздіктерді кезең-кезеңмен реттеп келе жатқандарын айтып ақталды. Дегенмен, бес жылда бар болғаны 7 үйдің іргетасын бекіткен. Қалған 23 көпқабатты баспана, алдағы уақыттың еншісінде деп отыр.
Алматы қаласы Жайлы қалалық орта басқармасының басшысы Сапар Нұрашев: «Бізде 24 үй қалған, сол 24 үйдің біреуі 197-ші үй, оны біз жасадық. Қалып тұрған 23 үй. Енді ол үйлерге «ҚазҚСҒЗИ» АҚ өзінің тексеру жұмыстарын жүргізіп жатыр. Тағы да 6 үй бойынша бізге қорытындыларын берді. Жұмыстарымызды осы жылдың аяғына дейін жалғастырамыз. Биылға бітпеген үйлерді келесі жылы да бұл жұмыс әрі қарай жалғасады», – дейді.
Тұрғын үйлердің іргетасы бекітілген күнде де оның сапалы болатынына тұрғындар сенбейді.   https://youtu.be/mIczX2lLzyA