Бұрындары мектепте «Әліппемен қоштасу» ертеңгілігі өтетін. 2016 жылы оқулықпен шынымен қоштастық. Орнын «Сауат ашу» басты. Білімнің бастауы, тәрбиенің мөлдірі «Әліппемен» бірге кеткендей күй кештік. Ендігі жеткіншек «Саққұлақ» күшіктің жырын, «Зығыр» әңгімесін оқымай ма деп қынжылдық. Тамыз конференциясынан сүйінші хабар жетті. 2021 жылдан бастап «Әліппе» мектеп бағдарламасына енеді.
Білім және ғылым министрі Асхат Аймағамбетов 2021 жылдан бастап беташар оқулықтың мектеп бағдарламасына кіретінін мәлімдеді.
«Ұстаздар болсын, ата-аналар болсын, көптен әліппе мәселесін көтеріп жүр. Бұл мәселе – өте маңызды. Біз «Әліппені» қайтару керек деп есептейміз. Ол 2021 жылы өздеріңізге жақсы таныс, қазақ тіліне бейімделген Ахмет Байтұрсыновтың әдістемесі негізінде енгізілетін болады. Әліппе – сынақ өткізетін алаң емес. Бізде нақты қазақ тіліне бейімделген әдістеме бар. Ол – Ахмет Байтұрсыновтың әдістемесі. Сондықтан ештеңені ойдан шығармай, осы әдістеме негізінде жұмыс жүргіземіз», – деді министр тамыз конференциясында.
Қазақ баласы үшін А.Байтұрсынов жазған «Әліппеден» артығы жоқ. Мұны министрдің өзі мақұлдап отыр. Біріншіге барған бала алдымен әріп жаттап, сосын сауат ашатыны қуантады.