«Астана Арена» стадионында Конституция күніне орай журналистер арасында футболдан Президент кубогы сарапқа салынды. Республикалық деңгейде өткен доп додасына еліміздің 11 аймағынан келген 25 команда қатысты.
Спорттық шарада Мәдениет және спорт министрі Ақтоты Райымқұлова мен Нұр-Сұлтан қаласының әкімі Алтай Көлгінов, Қазақстан Президентінің баспасөз хатшысы Берік Уәли, республикалық «Егемен Қазақстан» газетінің бас редакторы Дархан Қыдырәлі сөз сөйлеп, қатысушыларға сәттілік тіледі.
– Қазақстан Президентінің жүлдесі үшін шағын футболдан республикалық турнир Конституция күніне орай арнайы ұйымдастырылып отыр. Турнирдің мақсаты – БАҚ қызметкерлері арасында саламатты өмір салтын насихаттап, әріптестік және достық қарым-қатынасты нығайту. Бұл орайда Мемлекет басшысы Қасым-Жомарт Тоқаев бастамамызға қолдау білдіргенін айта кеткен жөн. Спорттық шараны жыл сайын дәстүрлі түрде өткізу жоспарда бар, – деді Президенттің баспасөз хатшысы Берік Уәли.
Командалар арасынан финалға Qazsport пен «Хабар» жолдама алды. Ақтық сында қос команда да жеңіс үшін барын салды. Дегенмен BAQ league-ның алты дүркін чемпионы атанған «Хабар» командасының қарқыны мықты болды. Олар матч бастала сала ойынды толықтай өз қолына алып, қарсылас қақпасына жиі қауіп төндірді. Қорғаныста да аса сақ ойнады. Тартысты өткен кездесу 5-2 есебімен аяқталды. Турнир қорытындысы бойынша «Хабар» командасы жеңімпаз атанып, 1 500 000 теңге ақшалай сыйлыққа ие болды. Марапаттау рәсімінде Президент әкімшілігі жетекшісінің орынбасары Мәлік Мырзалин жеңімпаздарға Президент кубогын табыстады. Ал жүлделі екінші орын алған Qazsport телеарнасына 700 000 теңгенің сертификаты берілді. Қола жүлдегер атанған «Хабар 24» командасы 300 000 теңгені еншіледі. Сондай-ақ жарыста үздік шыққан футболшылар арасынан жекелей номинация иегерлері анықталып, оларға 100 000 теңге сыйақы тағайындалды.
Жасыл алаңда керемет ойынымен көзге түсіп, қарсыластар қақпасына 9 доп салған Әлішер Келгенбай («Хабар») турнирдің үздік сұрмергені атанды. Командаластарын алға жетелеп, көрермен көзайымына айналған Еркебұлан Алдаберген («Егемен Қазақстан») – үздік қақпашы, Мақсат Сержан («Түркістан») – үздік қорғаушы, Әділбек Жақанов («Ақмешіт») – үздік шабуылшы, Нұржан Туғанбай («Тараз») – үздік ойыншы деп танылды.
– БАҚ қызметкерлері арасында «Астана Аренада» футболдан тамаша турнир өтті. Республика бойынша бас-аяғы 25 команда қатысты. «Тараз» құрамасы лайықты өнер көрсеткенімен бұл жолы жүлделі орын бұйырмады. Десек те, Президент кубогы турнирінің үздік ойыншысы атандым. Бәсі биік доданың ұйымдастырушысы – Берік Уәли мен BAQ league жобасының жетекшісі Әзиз Жұмаділге алғыс білдіреміз. Барлық жеңімпаз, жүлдегер әріптестерді марапатымен құттықтаймын, – деді Нұржан Туғанбай.
Айта кетейік, футболдан журналистер арасында өтетін Президент кубогы жыл сайын дәстүрлі түрде ұйымдастырылатын болды. Сондай-ақ турнирге қатысатын командалар санын арттыру да жоспарлануда.