Қ.Ясауи хикметтері, М.Хазани, Физули, Ә.Науаи, Хафиз шығармалары топтастырылып, оған ғылыми сипаттама берген жинақ жарық көрді. Сондай-ақ жинақта «Үміттің өлімі», «Алаңқай батыр», «Құлып» дастаны мен әңгімелер бар.
Қожа Ахмет Ясауи атындағы Халықаралық қазақ-түрік университеті Түркология ғылыми-зерттеу институты қорында сақталған көне кітаптар мен қолжазбалардың ғылыми сипаттамасын дайындады. Ғылыми сипаттама қос кітап болып жарыққа шықты. Орта Азия мен Қазан баспаханасында басылған араб, парсы, шағатай, қазақ тіліндегі кітаптар – институт қорындағы құндылық. Кезінде литографиялық тасбаспадан шыққан Қ.Ясауи хикметтері, М.Хазини, Физули, Ә.Науаидың кітаптары, қазақ шайырлары Шәді төре, Майлықожа секілді танымал ақындардың шығармалары топтастырылған. Сондай-ақ рухани мұра есебіндегі құнды жәдігерлер, шежірелер, тұрмыс-салт пен салт-дәстүрге қатысты жазба мен көне Құран кітаптар, діни дастандар мен шариғат үкімдері жайлы деректер бар.
ХХ ғасырдың алғашқы жартысында қадімше жазылған «Үміттің өлімі», «Алаңқай батыр», «Құлып» дастаны мен ел аузынан тараған әңгімелер мен 40-50 жылдары латын әрпімен жазылған 334 қолжазба бірінші жинаққа енді.
Бірыңғай араб қарпімен жазылған дүниелер екінші кітапта жинақталған. Ортағасырлық шайырлардан Хазини, Сағди, Науаи, Хафиз, Физули, Мырза Биделдің, Сопы Аллаярдың шағатайша, парсыша жазылған кітаптарын оқуға болады. Абай өлеңдерінің Мүрсейіт молда (1907 ж) хатқа түсірген толық шығармаларының көшірмесі мен Шәді төренің қиссаларына ғылыми сипаттама берілген. Қожа Ахмет Ясауидің «Диуани хикмет» кітабының бірнеше нұсқасы, «Назым Сияр шәріп» кітабының қолжазбасы жайлы анықтама бар.
Ғылыми сипаттама ішінде маңызды еңбектердің қатары бар. Олар – ХІХ ғасырда шағатайша кітап болып басылған «Шахнама» кітабы мен Тұрмағамбеттің «Рүстем-Дастан» кітабы. Сипаттамада ХХ ғасырдың басында өмір сүрген белгілі молда Бекасыл Биболатұлының парсы тіліндегі «Фалнама» кітабы бар. Соған ұқсас хижраның 1313 жылы жарық көрген «Балнама», «Насапнама», т.б. құнды мұралар туралы ақпарат кездеседі. Жинаушылар жайлы және жанры, қолтаңбасы, жазылған жылы және тағы басқа мәліметтер ұсынылған.
Айбике ЖАНАСЫЛ