Бүл күндері мұғалімдер қауымын жер-жерде ұлықтап, еңбектеріне табыс тілеп, құрмет көрсетіліп жатыр. Өйткені қазанның алғашқы жексенбісі – Ұстаздар күні! Сондай бір есте қалар жиын елордада салтанатты жағдайда өтті.
Педагогтардың қоғамдағы мәртебесін және беделін арттыру, үздік мұғалімдердің озық педагогикалық іс-тәжірибесін тарату мақсатында, 2012 жылдан бастап жыл сайын республикалық «Үздік педагог» конкурсы өткізіліп келеді.
«2019 жылдың үздік педагогі» байқауында техникалық және кәсіптік білім жүйесі бойынша 16 ұстаз үздік атанды. Олардың қатарында Қарағанды гуманитарлық колледжінің тарих және қоғамдық-саяси пәндер оқытушысы Алтай Аяғанов, Д.Мусин атындағы Көкшетау жоғары қазақ педагогикалық колледжінің педагогика оқытушысы Бақытгүл Батанасова, Семей қаласы М.Әуезов атындағы педагогикалық колледждің жалпы пәндер оқытушысы Бейбітгүл Калкенова бар. Ал мектепке дейінгі және орта білім жүйесі бойынша «2019 жылдың үздік педагогі» республикалық конкурсының жеңімпаздарының қатарына 48 мұғалім ілігіп отыр. Үздік педагогтар қатарында Нұр-Сұлтан қаласы №62 мектеп-лицейінің география пәнінің мұғалімі Алма Тұрғамбекова, Шымкент қаласы физика-математика бағытындағы Назарбаев Зияткерлік мектебі филиалының дене шынықтыру пәнінің мұғалімі Ербол Тлеулов, Абай атындағы республикалық мамандандырылған дарынды балаларға арналған қазақ тілі мен әдебиетін тереңдете оқытатын орта мектеп-интернатының қазақ тілі мен әдебиет пәндерінің мұғалімі Динара Орынбаева, Шығыс Қазақстан облысы Семей қаласы Шәкәрім атындағы үш тілде оқытатын гимназияның бастауыш сынып мұғалімі Нұргүл Мұқанова сынды мұғалімдер марапатқа ие болды.
Білім және ғылым министрі Асхат Аймағамбетов, Сенат пен Мәжіліс депутаттары «Үздік педагогтар» мен бірқатар білім саласы ардагерлерін Ыбырай Алтынсарин атындағы төсбелгімен марапаттады.
– Елбасымыз Н.Назарбаев егемендік алған күннен бастап, білім, ғылым саласына ерекше көңіл бөлді. Оны өздеріңіз де жақсы білесіздер. Елбасымыздың салиқалы саясатының арқасында жалпы мемлекетіміз, білім саласы биіктерден көрініп, жетістіктерге қол жеткізуде. Мемлекет басшысы Қасым-Жомарт Тоқаев өзінің сайлауалды бағдарламасында білім, ғылым саласын дамытуға үлкен назар аударып, біздің алдымызға нақты мақсат-міндет қойды. Мемлекет басшысы 4 жылдың ішінде ұстаздардың жалақысын 2 есе көтеру, білім саласын дамыту бойынша үлкен мақсат жүктеді. Осы заңды іске асыру үшін бюджеттен де қомақты қаражат қарастырылып отыр. Бүгінгі күннің өзінде 3 триллион теңгеден астам қаражат қаралды. Бұл біздің ұстаздарға, жалпы білім саласына деген үлкен құрмет, – деді Асхат Аймағамбетов.
Айта кету керек, биыл ел тарихында алғаш рет Қазақстан атынан еліміздің он бір ұстазы Нобель сыйлығы сияқты Әлем ұстазы дүниежүзілік сыйлығының халықаралық іріктеуіне қатысады. Бұл дүниежүзілік сыйлықтың иегері 2020 жылы наурыз айында Дубайда белгілі болады. Аталған сыйлықтың құны – бір миллион АҚШ доллары.
Қоғамдық маңызы бар бастамаларды дамыту қорының құрылтайшысы Әлия Назарбаева:
– Құрметті ұстаздар, мерекелеріңізбен құттықтаймын, мен үшін Әлем ұстазы сыйлығының іріктеуіне өткен мұғалімдерді марапаттау – үлкен бақыт. Өткен жылы Дубайға барғанда неге осы әлемдік додаға біздің қазақстандық мұғалімдер де қатыспайды деген ой келді, Білім және ғылым министрлігі де бұл идеяны құптады. Бүгін жеңімпаз он бір ұстаздың біреуі алдағы уақытта халықаралық жарыста іріктеліп алынады, – дей келе, үміткерлерге сәттілік тіледі.
Ал он бір үздіктің ішінде бас жүлдені, сонымен қатар Қоғамдық маңызы бар бастамаларды дамыту қорының төрт миллион теңгесін Нұр-Сұлтан қаласы Дарынды ер балаларға арналған «Білім-инновация» лицей-интернатының математика пәнінің мұғалімі Гул Муаммер қанжығасына байлады.
Кеште ұстаздарға арнап эстрада жұлдыздары Сәкен Майғазиев, Маржан Арапбаева, «Славян базарының» жеңімпазы Әділхан Макин және мектеп оқушылары өнер көрсетті.
Әділ БЕК